وزیراعظم شہباز شریف نا سی ایم ایچ کوئٹہ نادورہ، بلوچستان اٹی دہشت گرد آتون جنگ ترسا ٹھپی مروک آ سیکورٹی کارندہ غاتا جان پڑسی ءِ کرے

کوئٹہ۔ 03 فروری (اے پی پی) وزیراعظم محمد شہباز شریف سی ایم ایچ کوئٹہ نا دورہ ءِ کرے و قلات و بلوچستان نا ایلو ضلع غاتیٹی دہشت گرد آتون بہادری اٹ جنگ ترسا ٹھپی مروک آ سیکورٹی فورس آتا کارندہ غاتا جان پڑسی ءِ کرے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم ورناتا بہادری و ہمت آ اوفتے خراج تحسین پیش کرے و ٹھپی ورناتتون گپ وتران کرسا ملک اناخاطر قربانی نا جوزہ و وطن نا رکھ انا اوفتا بدل مفروک عزم انا ستاءِ کرے۔ نائب وزیراعظم و وزیرخارجہ اسحاق ڈار، وزیر دفاع خواجہ محمد آصف ، بنجائی وزیر حوالکاری و شینکاری عطاء اللہ تارڑ و بنجائی وزیر بجلی اویس لغاری ئسک ہم وزیراعظم تون اوار ئسر۔ داوخت آ وزیراعظم پارے کہ نم غٹ قوم انا ہیروک اورے، کنتون اوار مچ آ قوم ءِ نما و قربانی نا جوزہ غان سرشار نما خاہوت آ گمر ءِ۔ ہراتم اسکان قوم انا رکھ داوڑنا ورناتا دُوٹی ءِ، دشمن پاکستان نا کنڈآ خراب انگا نظرا ٹ ہُننگ ہم کپک۔ وزیراعظم پارے کہ دہشت گردی نا ناسور نا ملک آن پورو چٹفنگ کن پاکستان نا فوج و پاکستانی الس ہم کوپہ سلوک ءُ۔ بلوچستان اٹی دہشت وشرانا فضا تالان کروک آ زموار آک بلوچستان نا شونداری نا دشمن ءُ۔ بلوچستان نا الس نا رکھ اکن سیکورٹی فورس آک شرپسند زموار آتا توننگ کن دے و نن لگوک ءُ۔وزیراعظم پارے کہ بلوچستان نا امن، شونداری و شونہالی نا دشمن تا ناپاک عزم ءِ اسُل سرسہب مننگ کن اِلیپنہ۔