اسلام آباد۔ 31 جنوری (اے پی پی) بنجائی وزیر حوالکاری، شینکاری ، قومی میرات و دودوربیدہ عطاءا للہ تارڑ پارینے کہ نن پاک چین سنگتی ناامین و محافظ اُن، پاک چین سنگتی ننا است آتا خڑک و میرات اٹی ملانے، دا بروک آ وخت آتا محتاج اف، ون بیلٹ ون روڈ پاک چین سنگتی نا پاش آن پاش شاہدی ءِ، ننا قومی فرض ءِ کہ پاک چین سنگتی ءِ زیات سوگو کرسا بروک آ چین تسکان سرکین۔ داہیت ءِ او پاک چائنا میڈیا گروپ نا کنڈآن چین نا پوسکن آ قمری سال وموسم بہار نا دود آن تران کرسا پارے۔ بنجائی وزیر حوالکاری پارے کہ کیہی دہائی تیا تالان پاک چین سنگتی ننے تینا باوہ پیرہ غان میرات اٹی ملانے ہرا ننا است آتیان بھاز خڑک ءِ، داسنگتی نا بنداو حکومت آن حکومت و الس نا نیام اٹ والہانہ تعلق آٹی ءِ، ہڑتوم آملک آتانیام اٹ سیم آتون اوار اوار مش و شاہراک ہم شریک ءُ۔ پاک چین سنگتی سوگو بندھن ءِ ہرا ہمالیہ غان بڑز، سمندر آتیان کڑمب و شاد آن ہنین ءِ۔ عطاء اللہ تارڑ پارے کہ او پی این سی اے نا ایکسچینج پروگرام نا 6 وار بشخ رہینگانے، چین نا ہراشارتیٹی ہم اوہنا نے ہموڑے اسُل ملک آن پیشن مننگ نا احسا س متنے۔ ہموڑے مدام تینائی نا احساس مریک۔ بنجائی وزیر پارے کہ داہیت آ خوشی و گمرءِ کہ ہڑتوم آملک آتا الس اسہ ایلو نا عزت و شرف ءِ کیرہ، پاک چین سنگتی نا بے مٹ سفر جاری و ساری ءِ۔ عطاء اللہ تارڑ پارے کہ ون بیلٹ ون روڈ صدر شی جن پنگ نا شاندار و بے مٹ آ ڈٹ ءِ، داڑتون زرگزرن نا بھرمک گنڈوک ءُ۔ اوپارے کہ سی پیک نا اولیکو ریسہ پورو مننگ آن پد نن ارٹ میکو ریسہ نا کنڈآہِننگ اُن۔ گوادر بالی پٹ بناکرینے و اولیکو فلائیٹ ہم لینڈ مسنے ہرا بھاز بھلو مزل نا نشان اسے۔ اوپارے کہ ون بیلٹ ون روڈ پاک چین سنگتی نا شاہدی ءِ، داڑتون بھاز انگا کسہ غاک گنڈوک ءُ۔ قراقرم شاہراہ قطب انا مشی آ علاقہ و ریگستان تیان گدرینگسا گوادر آ چٹک اوکان پد سمندر نا سفر بناکیک۔ بنجائی وزیر پارے کہ نن پاک چین سنگتی نا امین و محافظ اُن، ننا قومی فرض ءِ کہ پاک چین سنگتی ءِ زیات سوگو کرسا بروک آچین تسکان سرکین۔ پاک چین سنگتی بروک آ وخت، بہارمرے یا خزاں ، نا محتاج اف۔ اوپارے کہ کنا دعاءِ کہ دا سنگتی مدام قائم و دائم سلے۔ پاکستان و چین آہنی ایلم ءُ، مدام جوان ومشکل وخت ءِ اوار خنانو، ہندن ءُ وخت ہم خنان ہراتم ہڑتوم آ تیا مشکل بس تو ہڑتوم آک اسہ ایلو تون سلیسر۔ عطاء اللہ تارڑ پارے کہ وزیراعظم شہباز شریف نا ساڑی آ دورہ ءِ چین اٹی صدر شی جن پنگ انا سلہ غا اونا باوہ پیرہ ئی آ علاقہ شیان آہنان ، چینی سنگت آتا منت وار اُن ہرافک مدام کمک فراوان کریر۔ اوپارےکہ پاک چین سنگتی نا سوگوی کن آخیریکو ساہ اسکان تینا کڑدءِ ادا کرسا کینہ، پاک چین سنگتی زندہ باد۔
