راولپنڈی/اسلام آباد۔ 31 جنوری (اے پی پی) صدر مملکت آصف علی زرداری جمعہ نادے آ پاک فضائیہ نا کنڈآن نیشنل ایرواسپیس سائنس اینڈ ٹیکنالوجی پارک انا دورہ ءِ کرے۔ ایوان ءِ صدر نا پریس ونگ آن جاری بیان نا رداٹ پاک فضائیہ نا سروک ایئرچیف مارشل ظہیر احمد بابر سدھوہم داوخت آ ساڑی ئس۔ دورہ ٹی صدر مملکت ءِ پارک انا بارواٹی سرجمی اٹ حوال تننگا۔ صدر مملکت ءِ پاننگاکہ سائنس اینڈ ٹیکنالوجی پارک پاک فضائیہ نا شونداری نا سفر اٹی اہم ءُ مزل نا نشان اسے۔ داڈٹ قومی اہمیت تخک۔ اودے معلومدار کننگاکہ سائنس اینڈ ٹیکنالوجی پارک پاکستان اٹی علم و ٹیکنالوجی آ تالان زرگزران نا بنداو جوڑ مننگ کن تیار ءِ۔ پارک انا مسخت خلائی، سائبر، آئی ٹی، مصنوعی ذہانت و ایرواسپیس اٹی نجی و پبلک سیکٹر نا ادارہ غاتے گنڈنگ ءِ۔ صدر مملکت ءِ مستی پاننگاکہ سائنس اینڈ ٹیکنالوجی پارک دنیا نا گچین ایرواسپیس ، سائبر و آئی ٹی کلسٹرآتیان اسٹ مننگ کن پورو وڑا ٹ تیار ءِ۔ پارک مون آ بروک ٹیکنالوجی، پٹ وپول وتیاری و اختراعی ہند آتون قومی منظرنامہ ءِ بدل کیک۔ پارک آن ملکءِ راجی، اقتصادی ، سیکورٹی و سائنسی وڑاٹ فائدہ مریک۔ صدر مملکت پاک فضائیہ واونا کسبکار کارندہ غاتا ستاءِ کرے۔ صدر مملکت نیشنل ایرواسپیس سائنس اینڈ ٹیکنالوجی پارک اٹی پوسکن آ تکنیکی چاگڑدی نظام نا ہم ستاءِ کرے۔ اوپوسکن آجنگی چیلنج آتون مون تننگ و قومی تزویراتی اہمیت نا ڈٹ آتے بے مٹ مد اٹ پورو کننگ آ پاک فضائیہ نا سرکڑدہ غاتا وژن و فعالیت نا ستاءِ کرے۔
