اسلام آباد۔ 31 جنوری (اے پی پی) وزیراعظم محمد شہباز شریف چینی سفیر ءِ چینی پوسکن آ سال انا مبارکبادی ترسا اومیت ظاہرکرینے کہ پوسکن آ سال پاکستان و چین نا نیام اٹ سنگتی نا رشتہ ءِ پین سوگو کیک و ہڑتوم آ ملک آتا الس کن شونہالی اتیک۔ جمعہ نادے آ وزیراعظم آفس نا میڈیا ونگ آن جاری بیان نار داٹ السی جمہوریہ چین نا پاکستان اٹی سفیر جیانگ زیڈونگ وزیراعظم تون وزیراعظم ہاؤس اٹی اوڑدہی کرے۔ اوڑدہی ٹی ہڑتوم آ ملک آتا نیام اٹ اقتصادی و سیکورٹی کمکاری نا بابت امور آ گپ وتران کننگا۔ وزیراعظم چینی سفیر ءِ چینی پوسکن آ سال انا مبارکبادی تس و پوسکن آسال انا دود آتیٹی چینی سرکڑدہ غاتون اوار اوار چین نا ایلم الس بشمول پاکستان اٹی رہینگوک غٹ چینی شاری تیکن نیک است خواہی نا درشانی ءِ کرے۔ اواومیت ظاہر کرے کہ داپوسکن آ سال پاکستان و چین نا نیام اٹ سنگتی نا رشتہ ءِ پین سوگو کیک و ہڑتوم آ ملک آتا الس کن شونہالی اتیک۔ چینی سفیر داخوشی نا وخت آ چینی حکومت و اونا الس کن نیک است خواہی نا درشانی ءِ کننگ آوزیراعظم و پاکستانی الس نا منت واری ءِ ہرفے۔
