اسلام آباد۔ 30 جنوری (اے پی پی) بنجائی وزیر داخلہ محسن رضانقوی قطبی وزیرستان اٹی خوارجی دہشت گرد آتا بہادری اٹ مقابلہ ءِ کرسا شہیدی نا جام ءِ نوش کروک آ میجر حمزہ اسرار و سپاہی محمد نعیم ءِ زبردست لوز آتیٹی خراج عقیدت پیش کرینے۔ پنچ شنبے نادے آتینا بیان اٹی وزیرداخلہ پارے کہ شہید میجر حمزہ اسرار و سپاہی محمد نعیم وطن اٹ امن نا خاطر تینا جون تے ندر کریر۔ اوفتا بہادری آ گمرکینہ، قوم انا دا بہادر گلزادہ غاک وطن آ ندر مرسا مدامی کن امر مسنو۔ اوپارے کہ میجر حمزہ اسرار و سپاہی محمد نعیم بہادری اٹ خوارجی دہشت گرد آتا مقابلہ ءِ کرسا شہیدی نا بڑزکو درجہ ءِ کٹار، اوفتا عظیم قربانی ءِ قوم سلام پیش کیک۔ محسن نقوی پارے کہ قوم دہشت گردی نا برخلاف جنگ اٹی شہید سیکورٹی فورس آتا آفیسر و ورناتا قربانی تے قدر انا نظراٹ ہرک۔ وزیرداخلہ شہید میجر حمزہ اسرار و سپاہی محمد نعیم نا خاہوت تون ہمدردی و ہڑزخواہی نا درشانی و 6خوارجی دہشت گرد آتے جہنمی کننگ آ سیکورٹی فورس آتے خراج تحسین پیش کرے۔ اوپارے کہ سیکورٹی فورس آک خوارجی دہشت گردآتا ناپاک عزم ءِ بے سہب کریر، قوم سیکورٹی فورس آتون ہم کوپہ سلوک ءُ۔
