اسلام آباد۔ 30 جنوری (اے پی پی) صدر مملکت آصف علی زرداری قطبی وزیرستان آپریشن اٹی سیکورٹی فورس آتا کنڈآن 6 خوارجی تے جہنمی کننگ آ اوفتے خراج تحسین پیش کرساپارینے کہ دہشت گرد آتا پورو چٹفنگ اسکان سیکورٹی فورس آتا کارروائیک برجاسلرہ۔ پنچ شنبے نادے آ ایوان ءِ صدر نا پریس ونگ آن جاری بیان نا رداٹ صدر مملکت انٹیلی جنس آ تالان کارروائی ٹی فتنۃ الخوارج نا دہشت گرد آتا بیخ ءِ کشنگ آ سیکورٹی فورس آتا بہادری نا ستاءِ کرے۔ اوکارروائی ٹی شہیدی نا جام ءِ نوش کروک آمیجر حمزہ اسرار و سپاہی محمد نعیم ءِ خراج عقیدت پیش کرے و اوفتا بہادری و جوزہ حب الوطنی نا ستاءِ کرے۔ صدر مملکت کارروائی ٹی 2 ورناتا شہیدی آ است ہسونی نا ہم درشانی ءِ کرے۔ اوشہید آتا خاہوت آتون ہمدردی نا درشانی ءِکرے و اوفتے کن صبر وجمیل نا دعاکرے۔ صدر مملکت نا پاننگ ئس کہ دہشت گرد زموارآتا چٹفنگ و ملکی دفاع کن ننا عزم غیرمتزلزل سلک۔ اوفتنۃ الخوارج نا پورو چٹفنگ نا قومی عزم انا ہم درشانی ءِ کرے۔
