اسلام آباد۔ 30 جنوری (اے پی پی) وزیراعظم محمد شہباز شریف پاکستان تحریک انصاف ءِ اسہ وار ولدا گپ وتران نا سلہ خلسا پارینے کہ حکومت سچااِنگا اُست اٹ مذاکرات کن تیار ءِ، ملک بے چیٹی نا کمک اٹ پین نسخان تے سگنگ کپک، حکومت نا دے و نن کوشست و گام گیج آتاسوب پاکستان نا شونداری و شونہالی نا تغ پورو مریک، پاکستان نا سلہہ بندفوج، پولیس و کانود نافذ کروک آ ادارہ غاک قربانی نا بے مٹ ءُ داستان نوشتہ کننگ ءُ۔ داخیال آتا درشانی ءِ او پنچ شنبے نادے آ بنجائی کابینہ نا دیوان آن تران کرسا کرے۔ وزیراعظم خوارج و دہشت گرد آتا تعاقب اٹی اوفتے جہنمی کرسا شہیدی نا جام ءِ نوش کروک آ میجر حمزہ اسرار و سپاہی نعیم ءِ خراج عقیدت پیش کرسا پارے کہ لمہ وطن نا دفاع کن قربانی تا بے مٹ داستان نوشتہ کننگ انگ ءِ، امن آن بیدس شونداری و شونہالی نا تغ پورو مننگ کپک۔ وزیراعظم پارے کہ خوارج و دہشت گرد آتا مقابلہ ءِ کننگک۔ وزیراعظم بنجائی کابینہ ءِ پی ٹی آئی تون مذاکرات نا پژدر آن معلومدار کرساپارے کہ نن اوفتا مذاکرات نا سلہ ءِ امنا کرسا اسپیکر قومی اسمبلی نا توسط اٹ کمیٹی نا ٹہیفنگ آن پد گپ وتران نا بناءِ کرین، کمیٹی پارے کہ خواست آتے نوشتہ کرسا تننگے ہرافتا ورندی ءِ ہم نوشتہی تروئی ئس، ولے تخوک آ تاریخ آن مست پی ٹی آئی مذاکرات آن نَرا، کمیٹی اوڑتون تولسا ہیت کننگ نا خواست کرے ہرادے مننگتو۔ وزیراعظم پارے کہ 2018نا گچین کاری تیان پد ہراتم نن مون ءُ پٹی تفسا ایوان اٹ پترینگا ن تو عمران نیازی پارے کہ او ہاؤس نا کمیٹی اس جوڑ کننگ ءِ، اونا جوڑ کروک آ کمیٹی نا اسہ نیم دیوان مس اوکان پد ہمودے ہنا و اینو نادے بسنے، داتینا زنچک اٹ ہلیر ہریر، اوجوڈیشل کمیشن آخا ہاؤس نا کمیٹی اس جوڑ کریسر ولے اونا کارروائی ءِ ہم مون آ دتور۔ وزیراعظم سلہ خلک کہ پی ٹی آئی برے نن ہاؤس کمیٹی نا کارروائیءِ مون آ دننگ کن تیاراُن، ہاؤس کمیٹی 2018 و 2024 نا گچین کاری تا جاست وپاست کے، ہندا وڑ کمیٹی 26 نومبر نا دھرنہ و 2014 نا دھرنہ غاتا ہم احاطہ ءِ کے، نن سُچا انگا اُست اٹ مذاکرات و گپ وتران کن تیار اُن،، تانکہ ملک مون آکائے نئے کہ اوفتا تالان کروک آ بے چیٹی نا دوتے اٹ ملک انا نسخان مرے، ملک پین نسخان تے سگنگ کپک۔ وزیراعظم کابینہ ءِ پارے کہ اسٹیٹ بینک پالیسی ریٹ اٹی اسہ درسد کمتی نا پڑو کرینے ہراکنا حساب آن کم ءِ، پالیسی ریٹ اٹی کمتی آن کاروبار و زرگزران ءِ فائدہ مریک۔ وزیراعظم پارے کہ حکومت اسہ ٹیم اسے نا وڑاٹ ملک انا شونداری و شونہالی کن دے و نن کوشست کننگ ءِ۔ وزیراعظم انسانی اسمگلنگ آن سد آ پاکستانی تا جون تا زیان مننگ آ است ہسونی نا درشانی ءِ کرسا پارے کہ دامون انگا دھندہ غان ملک انا تشخص و وقار مجروح مننگ ءِ، نن انسانی اسمگلنگ نا توننگ کن گام گیج کننگ اُن، ملک ءِ بدنام کروک آ کرپٹ زموار آتے اوفتے اوفتا کروک نا سزا تننگ اسکان آسرات تولپنہ۔
