لندن۔ 30 جنوری (اے پی پی) بنجائی وزیر ڈٹ بندی ، شونداری و خصوصی گام گیج پروفیسر احسن اقبال کیمبرج یونیورسٹی نا دورہ ءِکرے، ہراڑے او اسٹریٹجک پارٹنر شپ آرگنائزیشن نا نمائندہ، ہیلری پیروٹ تون اوڑدہی کرے۔ اوڑدہی ٹی پاکستانی طالب علم آتیکن کیمبرج و برطانیہ نا ایلو پنی آ جامعہ غاتیٹی پوسکن ءُ وارخواہی ودی کننگ کن کمکاری ءِ مون آ دننگ آ گپ وتران کننگا۔ کیمبرج ٹرسٹ انا رداٹ شریداری نا کماشی ءِ کروک آ ٹیم اتون مروک آ اوڑدہی ٹی وزیر ڈٹ بندی ءِ معلومدار کننگاکہ پاکستان و کیمبرج نا نیام اٹ اسیجائی فنڈڈ پی ایچ ڈی اسکالرشپ دستیاب ءِ ولے گڑاس عملی اڑاند آتا سوب آن دا وظیفہ غاک پورو وڑاٹ کاریم اٹ اتنگ متور۔ احسن اقبال دا باندات آ گڑتی نا درشانی ءِ کرسا دمدستی وڑاٹ چیئرمین ہائرایجوکیشن کمیشن (ایچ ای سی) ءِ پارت کرے کہ او دا اڑاند آتے مرکے و پک کے کہ غٹ دوئی وظیفہ غاتے ہموحقدار پاکستانی طالب علم آتے تننگے ہراکیمبرج اٹی پی ایچ ڈی پروگرام اٹی داخلہ ہلکنو، و درکار آب آتیا پورو سلرہ۔ داکان بیدس او باسک سائنس و ٹیکنالوجی، پلاننگ کمیشن ءِ دا باندات نا چاروکی نا زمواری ءِ تس، داہیت آ زور شاغسا پارے کہ اسہ ہم اہل طالب علم اس داموقع غان محروم سلپ۔ وزیر ڈٹ بندی دا عزم انا درشانی ءِ کرے کہ ہرپاکستانی طالب علم، ہرادنیا نا گچین جامعہ غاتیٹی داخلہ ہلیک، اودے مالی کمک فراوان کننگے۔
