اسلام آباد۔ 29جنوری (اے پی پی) بنجائی وزیر غذائی رکھ و پٹ وپول رانا تنویر حسین تون بی جی آئی جینو مکس گروپ (ساؤتھ ایشیا) نا ڈل ڈاکٹر وانگ جیانگ نا کماشی ٹی اوڑدہی کرے۔ چارشنبے نادے آ مروک آ اوڑدہی ٹی فوڈ سیکورٹی، جینومیکس و کشاری بشخ اٹی پٹ وپولی سرجزآتامون آ دننگ و ہڑتوم آ کنڈآتا کمکاری آ سرجمی اٹ گپ وتران کننگا۔ بنجائی وزیر رانا تنویر حسین پارے کہ کشت وکشار نا بشخ ءِ مون تروک چیلنج آتون مون تننگ کن ہڑتوم آکنڈآتا کمکاری و پٹ وپول المی ءِ، بی جی آئی تون اواری اٹ پوسکن آ جینیاتی ٹیکنالوجی نا مون آ دننگ آن پیدوار اٹی ودکی مریک و فصل آتے موسمی تغیرات آن رکھ کننگ مریک۔ اوپارے کہ بی جی آئی تون پٹ وپولی سرجزآ تامون آ دننگ و اسیجائی ڈٹ آتا خواہندار اُن۔ اوپارے کہ کشاری بشخ بھا ز اہمیت تخک، ساڑی حکومت دا بشخ انا شونداری و گچینی نا گچین حکمت نا رداٹ کاریم کننگ ءِ۔ اومستی پارے کہ پٹ وپولی سرجزآتا نتیجہ و پوسکن آ ٹیکنالوجی بزغرآتا درگہ اسکان سرکرسا نئے بیرہ پیدوار ءِ ودفنگ مریک بلکن نیزگاری ٹی نمان کمتی بننگ کیک۔ اوبی جی آئی و ایلو جہانی شریدار آتون اواری اٹ کشاری بشخ انا شونداری آور گچینی کن سنبرینگوک ءِ، اوبی جی آئی گروپ نا پاکستان آ بننگ نا خیرمقدم ءِ کرسا پارے کہ ہڑتوم آ کنڈآتا کمکاری نا مون آ دننگ آن کشاری بشخ اٹی جدت بریک۔
