اسلام آباد۔ 29 جنوری (اے پی پی) بنجائی وزیرواپار جام کمال خان تون امریکی چارج ڈی افیئرز نٹالی اے بیکر اوڑدہی کرے ہراٹی ہڑتوم آ کنڈآتا واپار و زرکاری نا تعلقداری تے سوگو کننگ و آخبت اٹ کمکاری نا پوسکن وارخواہی پٹنگ آ گپ وتران کننگا۔ وزارت واپار آن جاری بیان نا رداٹ چارشنبے نادے آمروک آ اوڑدہی ٹی بنجائی وزیر واپار جام کمال خان نٹالی اے بیکر وامریکی حکومت ءِ اقتدار نا گدریفنگ نا سرسہب عمل آ مبارکبادی تس و دااومیت نا درشانی ءِ کرے کہ بروک آ وخت اٹی ہڑتوم آملک آتا نیام اٹ تعلقداری پین سوگو مریک۔ ہڑتوم آ فریق آک ہڑتوم آ کنڈآتا واپار ءِ مون آ دننگ و اہم اقتصادی بشخ آتیٹی کمکاریءِ ودفنگ نا عزم انا درشانی ءِ کریر۔ اوڑدہی ٹی کشت وکشار نا بشخ اٹی کمکاری ءِ ودفنگ، خاص وڑاٹ ٹیکسٹائل و کشاری مصنوعات اٹی ویلیو ایڈیشن آ زور شاغنگا۔ ہڑتوم آ راہشونک کاٹن انڈسٹری ٹی شونداری نا وارخواہی و معدنیات، ٹیکسٹائل و قابل تجدید توانائی کون آ ممکنہ زرکاری نا بشخ آتا پیدواری ءِ ہم کرے۔
