اسلام آباد۔ 29 جنوری (اے پی پی) بنجائی وزیر امور کشمیر و گلگت بلتستان و صدر مسلم لیگ (ن) خیبرپختونخوا انجینئر امیر مقام پارینے کہ مسلم لیگ السی خذمت، ملکی شونداری و راجی آسودہی نا مشن کاربند ءِ، پارٹی ءِ سوگو کننگ و السی خذمت نا جوزہ ءِ مون آ دننگ مسلم لیگ (ن) نا اولیت ءِ۔ داخیال آتا درشانی ءِ او بحریہ ٹاؤن اسلام آباد اٹی اسہ دود اسے نا کماشی ءِ کرساکرے۔ دود اٹی ٹی ایل پی نا مسکوہی اومیتدار NA-30پیر ظاہر شاہ تینا خاہوت و سنگت آتون اوار مسلم لیگ (ن) اٹی باضابطہ شمولیت اختیارکرے۔ انجینئر امیر مقام پوسکن اوار مروک آتے پارٹی نا روایتی کیپ اس بیرفے و اوفتے بخیراٹ پارسا پارے کہ پیر ظاہر شاہ و اوناسنگت آتا شمولیت نئے بیرہ مسلم لیگ (ن) نا ودوک آ السی مقبولیت نا اعتراف بلکن قائد محمد نواز شریف و وزیراعظم محمد شہبازشریف نا شاندار کارکڑد آ السی پت انا درشانی ءِ۔ اوپارےکہ مسلم لیگ (ن) السی خذمت، ملکی شونداری و راجی آسودہی نا مشن آ کاربندءِ، خیبرپختونخوا ٹی پارٹی نا سوگوی کن دا شمولیت اہم گام اسے۔ انجینئر امیر مقام پارے کہ پارٹی ءِ سوگو کننگ و السی خذمت نا جوزہ ءِ مون آ دننگ مسلم لیگ (ن) نا اولیت ءِ، پوسکن اوار مروک آ بندغ آتا جوزہ و اخلاص پارٹی کن نہادی میرات پک مریک و السی ویل آتا ایسری کن اسیجائی کوشست آتے سوگوی ملک۔ دود اٹی مسلم لیگ (ن) پشاور نا صدر راشد محمود خان، سیکرٹری جنرل امان اللہ خان، سیکرٹری حوالکاری اعجاز خان بڈھ بیر، نائب صدر ملک راشد حسین، سینیٹر اکرام اللہ خان و حقداد خان ئسک ساڑی ئسر۔ پارٹی راہشونک پیر ظاہر شاہ و اونا سنگت آتے جم وجوش اٹ بخیرکریر و پاریر کہ اوفتا شمولیت آن پارٹی نا بنداو پین سوگو مریک و السی خذمت نا مشن ءِ سوگوی اس ملک۔
