اسلام آباد۔ 29 جنوری (اے پی پی) وزیراعظم محمد شہباز شریف پاکستان نا حکومت و الس نا کنڈآن چین نا صدر شی جن پنگ، چینی الس و پاکستان اٹ ساڑی چینی شاری تے چین نا پوسکن آ سال انا وخت آ مبارکبادی ترسا پارینے کہ چین نا نشاۃ ثانیہ 21 می صدی نا بھاز اہم وارخواہی تیان اسٹ ءِ، پاکستان وچین نا نیام اٹ سنگتی نا بے مٹ رشتہ پدریسہ سوگو تر مننگ ءِ، ننا تعلقداری داسہ جوان تزویراتی شریداری ٹی بدل مسنے۔ چارشنبے نادے آ چین نا پوسکن آسال انا وخت آ تینا ویڈیو کلہو اٹی وزیراعظم پارے کہ او پاکستان نا حکومت و الس نا کنڈآن صدرشی جن پنگ ، چین نا برارد الس و پاکستان اٹی ساڑی چینی سنگت آتے پوسکن آ سال انا خوشی تا وخت آ است انا حب اٹ مبارکباد کیک۔ وزیراعظم پارے کہ چین نا نشاۃ ثانیہ 21 می صدی نا بھاز اہم وارخواہی تیان اسٹ ءِ، تدوک آ شش دہائی تیٹی چین نا شونداری نا سفر چین نا سرکڑدہ خاص وڑاٹ چینی صدر شی جن پنگ نا پامداری و دوراندیشی نا شاہدی ءِ، چین نا سرسہبی نا کِسہ ننے تحریک و خواری نا ترغیب ایتک۔ وزیراعظم پارے کہ پاکستان وچین نا نیام اٹ سنگتی نا اسہ بے مٹ ءُ رشتہ اسے ہرا پدریسہ سوگو ترمننگ ءِ، تین پہ تینی پت و اسیجائی است خواہی تتون گنڈوک ننا خڑکی تعلقداری داسہ اسہ جوان ءُ تزویراتی شریداری اسے ٹی بدل مسنے، دا آہنی ایلمی پدریسہ پاکستان نا خارجہ پالیسی تا بنداو ءِ۔ اوپارے کہ چینی پوسکن آ سال انا پوسکنی، بدلی، و پوسکن آ بنانا قول انا نشانی ءِ۔ داوخت آمخلوق تینا خاہوت وسنگت آتون اوار روایتی کن وخور، ٹیکی تا ہل و تننگ، و بروک آ سال اکن آسائش آتے مدعو کننگ کن جمع مریرہ۔ وزیراعظم پارے کہ برجاچینی سال انا نشانی’’سانپ‘‘ حکمت نا نشانی ءِ ہراننے مشکل آتیان پیش تمنگ نا قوت و اجتماعی طاقت نا سبخ ایتک،نناگہری وپائیدار سنگتی نا سوب آ ن پاکستان و چین اسہ جوان ءُ دنیا سے کن تینا بدل مفروک عزم اٹی یکجاءُ، نن اواری اٹ جہانی امن، شونہالی و ہم گرنچی کن بامعنی بشخ ہلسا کینہ۔ وزیراعظم دعاکرے کہ دا سال ننا اِرا عظیم قوم تیکن خوش بختی و پدریسہ سرسہبی اتے و ننا الس نا نیام اٹ رشتہ غاتے پین سوگوکے۔ اوپارےکہ اسیجائی آخبت کن پاکستان وچین اوار ءُ۔
