راولپنڈی۔ 29 جنوری (اے پی پی) پاکستان کرکٹ بورڈ (پی سی بی ) نا چیئرمین محسن نقوی پارینے کہ آئی سی سی چیمپئنز ٹرافی نا سرسہب اڈتننگ کن تیاریک پورو ءُ۔ ٹورنامنٹ ءِ یات گار کینہ۔ پی سی بی نا کنڈآن جاری سرجم حوال آتا رداٹ چیئرمین پی سی بی راولپنڈی کرکٹ اسٹیڈیم نا دورہ ءِ کرے و چیمپئنز ٹرافی کن اپ گریڈیشن پروجیکٹ آ پیش رفت نا جاچ ءِ ہلک۔ چیئرمین پی سی بی پویلین، میڈیا باکس، وی آئی پی باکسز آتون اوار اسٹیڈیم نا چندی بشخ آتا معائنہ ءِ کرے و فنشنگ ورک نا مشاہدہ ءِ کرے۔ اواپ گریڈیشن پروجیکٹ آ پیش رفت آ است جمی نا درشانی ءِ کرے۔ داوخت آ گپ وتران کرسا اوپارےکہ راولپنڈی اسٹیڈیم نا تزئین و آرائش نا کاریم آخیریکو ریسہ غاتیٹی ءِ وخت اس کہ پویلین و میڈیاباکس انا تزئین و آرائش نا کاریم پورو مسنے۔ اوپارے کہ انکلوژرزاٹی کرسی تا خلنگ نا کاریم آخیریکو ریسہ غاتیٹی ءِ ہرادے منہ دے اٹی پورو کننگک۔ اوپارے کہ بھلو وخت اسے آن پد پاکستان اٹی آئی سی سی ٹورنامنٹ اڈتننگ انگ ءِ۔ میگا ایونٹ نا سرسہب اڈتننگ کن غٹ تیاریک پورو ءُ۔ اوپارے کہ چیمپئنز ٹرافی ٹورنامنٹ ءِ یات گار کینہ و اومیت ءِ شونقی تے گچین کرکٹ اس ہُننگ کن ملک۔ محسن نقوی ٹیم تیکن سلاہ ئی سیکورٹی بست وبند آتا ہم جاچ ءِ ہلک۔ چیمپئنز ٹرافی نا بنا19فروری آن مریک و راولپنڈی اسٹیڈیم اٹی مسہ میچ مریک۔ اولیکو میچ 24 فروری آ بنگلہ دیش و نیوزی لینڈ، ارٹ میکو میچ 25 فروری آ آسٹریلیا و جنوبی افریقہ وخت اس کہ مسٹ میکو میچ 27 فروری آ پاکستان و بنگلہ دیش نا نیام اٹ مریک۔
