اسلام آباد۔28جنوری (اے پی پی): بنجاھی وزیر برائے تجارت جام کمال خان ءَ گوشت کہ ملک ءِ معیشت جوانیں رنگ ءَ دیم ءَ شتگ، اقتصادی استحکام ءِ واستہ پالیشی آنی تسلسل المی اِنت، ءُ معیشت ءَ را مھکم کنگ ءِ واستہ برآمدات ءِ تہ ءَ گیشی ءِ سر ءَ دلگوشی دیگ بوھگ ءَ اِنت۔ آئی ءَ اے ھیالانی درشانی سئے شمبے ءِ روچ ءَ پاکستان بزنس کونسل ءِ نیمگ ءَ معیشت ءِ سرھال ءِ سر ءَ برجم داشتگیں مراگش ءَ گوں گشتانک دیان ءَ کت۔ بنجاھی وزیر جام کمال خان ءَ گوشت کہ حکومت جتا جتائیں ملک آنی گوما تجارتی سیادی آنی تہ ءَ گیشی ءِ واستہ جوانیں گامگیج کنگ ءَ انت ءُ اے گامگیج آنی جوانیں آسر ھم دیم ءَ آھگ ءَ انت۔ آئی ءَ گوشت کہ آ برآمدات ءَ را گیش کنگ ءِ واستہ نوکیں مارکیٹ آنی شوھاز ءَ اَنت، ءُ پاکستان ءَ سرمایہ کاری ءِ مزنیں موہ است اَنت۔ پاکستان ءَ دری سرمایہ کار آھگ ءَ انت ءُ حکومت اے سرمایہ کار آناں آسراتی پجاری کنگ ءَ انت ۔ آئی ءَ گوشت کہ صنعت کار آناں ھمک رنگ ءِ آسراتی پجاری ءِ کوشست کنگ بوھگ ءَ انت پرچا کہ صنعت ءِ وسیلگ ءَ برآمدات ءِ تہ ءَ گیشی بوت کنت۔ آئی ءَ گوشت کہ آ امریکہ ءُ یورپ ءِ گوما جتا جتائیں شوبگ آنی تہ ءَ کمک کنگ ءِ واستہ کار کنگ ءَ اَنت، ءُ گلوبل مارکیٹ ءَ سر بوھگ ءَ را ممکن جوڑ کنگ بوھگ ءَ اِنت۔ جام کمال خان ءَ گوشت کہ حکومت بنجاہی صنعت ءَ را دیمروئی دیگ ءِ واستہ کوشست کنگ ءَ انت ءُ اے درگت ءَ سرجمیں ملک ءَ ایکسپو سنٹر آنی تہ ءَ نمائش آنی برجم دارگ بوھگ ءَ انت اے سیریز برجاہ مان ایت تانکہ بنجاہی سوداگر ءُ بنجاہی صنعت ایشی ءَ چہ سیت بہ زور انت۔
