اسلام آباد۔ 28 جنوری (اے پی پی) وزیراعظم محمد شہباز شریف بلوچستان نا ضلع قلعہ عبداللہ نا علاقہ گلستان اٹی 5 خارجی تے خلنگ آ سیکورٹی فورس آتے شاباشی ترساپارینے کہ حکومت و سیکورٹی فورس آک ملک آن دہشت گردی نا پورو چٹفنگ نا عزم کرینو۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم خارجی تا برخلاف کارروائی ٹی نائیک طاہر خان و لانس نائیک طاہر اقبال نا شہیدی آ ڈکھیائی وا ست ہسونی نا درشانی ءِ کرے۔ اوشہید آتا درجہ غاتا بڑزی و اوفتا خاہوت کن صبر وجمیل نا دعاکرے۔ وزیراعظم پارے کہ انسانیت نا دشمن تا ناپاک عزم ءِ اسُل سرسہب مننگ کن الیپنہ، دہشت گردی نا برخلاف جنگ اٹی تینا جون تے ندرکروک آ سیکورٹی فورس آتا نڈر ورناتا قربانیک زیان مفسہ۔ وزیراعظم پارے کہ قوم ءِ دہشت گرد آتا برخلاف سوگو ءُ دیوال اسے آنبار سلوک سیکورٹی فورس آتا گلزادہ غاتیا گمرءِ۔ حکومت و سیکورٹی فورس آک ملک آن دہشت گردی نا پورو چٹفنگ کن سنبرینگوک ءُ۔
