چیمپئن ٹرافی نا پاکستان آ بننگ ننکن شرفمندی نا سوب ءِ، بنجائی وزیر حوالکاری عطاء اللہ تارڑ نا میڈیا تون گپ وتران

اسلام آباد۔ 28 جنوری (اے پی پی) بنجائی وزیر حوالکاری ، شینکاری ، قومی میرات و دودوربیدہ عطاء اللہ تارڑ پارینے کہ مستین اٹ پاکستان اٹی گوازی تا پڑویران مسوسس، کیہی سال آن پد پاکستان اٹ بھلا ایونٹ آتا بنامننگ ءِ، چیمپئن ٹرافی نا پاکستان آ بننگ ننکن شرفمندی نا سوب ءِ۔ سےشنبے نادے آ داڑے میڈیا تون گپ وتران کرسا بنجائی وزیر حوالکاری پارے کہ شنگھائی کمکار تنظیم نا سروکی دیوان آن پد سپورٹس نا میگاایونٹ پاکستان اٹی گوازی کننگک ہرا ننکن شرفمندی نا سوب ءِ۔ اوپارے کہ پی ٹی وی نیشنل براڈ کاسٹر ءِ، پی ٹی وی سپورٹس نا ریٹنگ اٹی ہم ودکی مسنے۔ بنجائی وزیرپارے کہ آئی سی سی نا رائٹس نا دوئی کننگ کن وخت آ ادائیگی کرین، اونا غٹ شڑت آتے پورو کرینن۔ پی ٹی وی آئی سی سی نا غٹ میچ آتے نشان ایتک۔ اوپارے کہ کرکٹ نشریات کن جوان ءُ چینل اس ترتیب تننگ اُن، شعیب اختر، شعیب ملک تون اوار ایلو اسٹار آتے اسکرین آ اتنگک۔ اوپارے کہ پی ٹی وی اسپورٹس ءِ پین مون آدینہ۔ اوپارے کہ مستین اٹ پی ٹی وی اسپورٹس نا تہہ ٹی باندات آک سہی الورہ، پی ٹی وی نا تہہ ٹی ہموڑے ریفارمز کننگتو ہراڑے بایدے مروسس۔ آئی سی سی نا ادائیگی تا بابت ہچ ءُ لائحہ عمل اس الوکہ۔ ننا کوشست ءِ کہ شفاف نظام نا رداٹ اسپورٹس چینل ءِ بحال کننگے۔ اسہ سوج اسے ٹی اوپارے کہ ریڈیو پاکستان اٹ آن لائن پنشن نا اسہ جوان ءُ نظام اس درستی راستی کرفنگانے، گھوسٹ ملازم آتا درستی راستی  ءِ کروک آ آفیسر آتے شاباشی تننگے، داوڑنا ملازم آتے کشسا قوم انا پیسہ غاتے بچفینو۔ ایلو ادارہ غاتیٹی ہم داوڑنا کاریم نا گرج ءِ۔ اوپارے کہ پی ٹی وی و ریڈیوپاکستان اٹ مثبت بدلی مون آبریک۔