اسلام آباد۔ 28 جنوری (اے پی پی) وزیراعظم محمد شہباز شریف ورناتے بدلی نا نوید گوندسا پارینے کہ قومی شونداری وپالیسی سازی ٹی ورناتا کڑد ءِ ودفنگ نا گرج ءِ۔ تعلیم ءِ مون آ درسا ورناتے واکدار کننگ مریک، ورناک پرامن و شونہال آخبت نا ضمانت ءُ، چیلنج آتون مون تننگ اٹ دولت مشترکہ باسک ملک آتا نیام اٹ گچین شریداری نا پلیٹ فارم ءِ، وزیراعظم یوتھ پروگرام ورناتا شونداری و شونہالی نا فلیک شپ پروگرام ءِ۔ اوداخیال آتا درشانی ءِ سے شنبے نادے آ داڑے کامن ویلتھ ایشیا یوتھ الائنس (کایا) سمٹ آن تران کرسا کرے۔ دود اٹی بنجائی وزیر حوالکاری و شینکاری عطاء اللہ تارڑ، وزیراعظم نا کوآرڈی نیٹر چاگڑدی بدلی رومینہ خورشید عالم و درملکی مندوبین آک ہم ساڑی ئسر۔ وزیراعظم حکومت و الس نا کنڈآن سمٹ نا بشخ ہلوک آتے بخیراٹ پارساپارے کہ کامن ویلتھ ایشیا یوتھ سمٹ نا مہمانداری آ خوشی ءِ۔ وزیراعظم پارے کہ پاکستان دولت مشترکہ نا بانی باسک ءِ، پاکستان دولت مشترکہ و اونا ادارہ غاتے بھاز اہمیت ایتک دا اسہ اہم ءُ پلیٹ فارم اسے ہرا شریداری نا قیام و امنائی سلاہ ودی کننگ نا ذریعہ ءِ، دولت مشترکہ نا 60 درسد آبادی نا وئی 30 سال آن کم ءِ، اوپارے کہ دولت مشترکہ ملک آتا آخبت ورناتیا سیبوءِ، ننے ورناتا لائخی تے مون آاتوئی مریک، ورناتے پوسکن آ ٹیکنالوجی و فنی تعلیم آن آراستہ کروئی ءِ، ورناک پرامن و شونہال آخبت نا ضمانت ءُ۔ وزیراعظم پارے کہ پاکستان نا 70 درسد آبادی نا وئی 30 سال آن کم ءِ، نن تینا دالائخی تیان جوانی اٹ بلد اُن و نن اوفتے اسہ موقع سے ٹی بدل کننگ کینہ ہراپاکستان نا شونداری و شونہالی ٹی تینا پبی کڑد ءِ ادا کننگ کیرہ۔ وزیراعظم پارے کہ ورناک نئے بیرہ آخبت نا لیڈر ءُ بلکن اینو ہم بدلی نا محرک ءُ، ورناتے پوسکن آ ٹیکنالوجی و فنی تعلیم آن شپ کروئی مریک، قومی شونداری نا کوشست آتیٹی اوفتے پبی بشخ ہلنگ نا حامل جوڑ کننگ نا گرج ءِ۔ ننے ورناتا لائخی تا درک ءِ، ورناک بدلی نا نوید ءُ، قومی شونداری وپالیسی سازی ٹی اوفتا کڑد ءِ ودفوئی ءِ۔ قوم انا شونداری و شونہالی ٹی ورناتا کڑد ءِ گوجالنگ مفک۔ وزیراعظم پارے کہ ای مدام ورناتا شونداری و آسودہی آ چکار کرینٹ تینا غٹ سیاسی زند اٹی ورناتے واکدار کننگ نا بابت گام گیج کرینن۔ پرائم منسٹر یوتھ پروگرام ورناتا شونداری وآسودہی نا فلیگ شپ پروگرام ءِ ، مسکوہی وزیراعظم نواز شریف ورناتیکن بھازانگا وارخواہی فراوان کرے و اوفتے کن کیہی پروگرام تا بناءِ کرے ، نن طالب علم آتے آب اٹ تعلیم نا فراوانی کن مچ آپنجاب اٹی دانش اسکول جوڑ کرینن، آزادکشمیر ، گلگت بلتستان ، بلوچستان و ایلو مر مرا نگا علاقہ غاتیٹی ہم دانش اسکول جوڑ کننگ انگ ءِ، ورناتا راجی آسودہی نا بابت پنجاب و بنجاچندی ڈٹ آتا بناءِ کرینو ہرافتے ٹی پنجاب ایجوکیشن انڈومنٹ فنڈ انا کمک اٹ کم مالی وسیلہ غاتا حامل طالب علم آتے وظیفہ غاتا فراوانی ءِ پک کننگانے۔ اوپارے کہ طالب علم آتیکن لیپ ٹاپ انا فراوانی بھاز اہمیت تخوک ءُ ڈٹ اسے ہراڑآن طالب علم آک تینا تعلیمی گرج آتے پورو کننگ کیرہ، وزیراعظم پارے کہ آزادکشمیر، گلگت بلتستان و بلوچستان تون اوار مچ آملک انا طالب علم آتے لیپ ٹاپ فراوان کننگ انگ ءِ۔ پرائم منسٹر یوتھ پروگرام نا کمک اٹ6 لکھ ہُشار و حقدار طالب علم آتے لیپ ٹاپ تننگانے، کورونا دین نا جہانی دین اٹی دالیپ ٹاپ تعلیم نا ذریعہ جوڑ مسر۔ وزیراعظم پارے کہ تعلیم ءِ مون آ درسا ورناتے واکدار کننگ مریک، ننا آخبت واکدار ورناتا دوٹی ءِ۔ داکان مست چیئرمین پرائم منسٹر یوتھ پروگرام رانا مشہود احمد مندوبین آتا خیرمقدم ءِ کرسا پارے کہ علاقائی کمیونٹی نا حیثیت اٹ اوفتا داڑے ساڑی گری یکجہتی نا جوزہ نا ڈیک ءِ۔ اوپارے کہ کامن ویلتھ ایشیایوتھ سیکرٹریٹ نا قیام ستاکڑزوک و پاکستان نا ورناتیا پت انا درشانی ءِ۔ داوخت آ وزیراعظم نیشنل یوتھ کونسل نا باسک آتیان سوغند ہلک۔ وزیراعظم نمان کارکڑد نشان تروک آ ورناتیٹی ایوارڈ ہم بشخا۔
