اے این ایف نا منشیات اسمگلنگ نا برخلاف مچ آ ملک اٹی کریک ڈاؤن، 6 دوبہ دار دزگیر

راولپنڈی۔ 28 جنوری (اے پی پی) اینٹی نارکوٹکس فورس ملک انا چندی شار تیٹی منشیات اسمگلنگ نا برخلاف برجاکریک ڈاؤن اٹی 7 کارروائی تیٹی 6 دوبہ دار آتے دزگیرکرے۔ سے شنبے نادے آاے این ایف کوارٹر راولپنڈی آن جاری تدوک آ 24 گھنٹہ نا انسداد منشیات کارروائی تا سرجم حوال آتا رداٹ تازہ کارروائی تیٹی 32 لکھ روپئی آن زیات مالیت نا 19.659 کلوگرام منشیات دوئی کننگا۔ راولپنڈی ٹی واقع کوریئر آفس اٹی برطانیہ غان مون تروک آ پارسل آن 18 گرام کوکین، 10 گرام آئس و 8گرام ویڈ دوئی کننگا۔ کارروائی ٹی اسہ دوبہ دار اسے ہمووخت آ دزگیرکننگا۔ کراچی ٹی کارگوآفس نا کمک اٹ آسٹریلیا غا مون تروک آ پنچنگ بیگ آتیا تالان پارسل آن 4.6 کلوگرام آئس دوئی کننگا۔ بلوچستان اٹی پنجگور نا غیرآباد علاقہ غان 15 کلوگرام چرس دوئی کننگا۔ ایم ون موٹروے اسلام آباد نا خڑک مسافر بس اٹی سوار دوبہ دار آن 23 گرام ہیرون دوئی کننگا۔ اے این ایف ترجمان پارے کہ دزگیر دوبہ دار نا برخلاف انسداد منشیات ایکٹ انا رداٹ مقدمہ نوشتہ کرسا جاست وپاست نا بناءِ کننگانے۔