اسلام آباد۔ 28 جنوری (اے پی پی) وزیراعظم محمد شہباز شریف بنجائی حکومت نا کنڈآن طبی آسراتی تے پوسکن آوڑتتون ہم گرنچ کننگ و اسلام آباد ءِ ماڈل اس جوڑ کننگ نا پارت کرسا پارینے کہ حکومت مچ آملک اٹی جان جوڑی نا آسراتی اسکان رسینگ کن اولیتی بنداو تیا کاریم کننگ اٹی ءِ۔ وزیراعظم آفس نا میڈیا ونگ انا کنڈآن جاری بیان نا رداٹ داخیال آتا درشانی ءِ او سے شنبے نادے آ تینا کماشی ٹی وزارت قومی جان جوڑی نا امور آ جاچ دیوان اٹی کرے۔ دیوان اٹی بنجائی وزیر ڈٹ بندی احسن اقبال، بنجائی وزیر اقتصادی امور احدخان چیمہ، بنجائی وزیر کانود وانصاف اعظم نذیر تارڑ ، وزیراعظم نا کوآرڈی نیٹر قومی جان جوڑی ڈاکٹر ملک مختار احمد بھرتھ و تعلقدار بڑزکو سرکاری آفیسر آک بشخ ہلکر۔ وزیراعظم پارے کہ حکومت مچ آ ملک اٹی جان جوڑی نا آسراتی اسکان رسینگ کن اولیتی بنداو تیا کاریم کننگ اٹیءِ۔ وزیراعظم بنجائی حکومت نا کنڈآن جان جوڑی نا چیٹ انا نظام ءِ پوسکن آوڑتتون ہم گرنچ کننگ، جان جوڑی نا آسراتی تا بابت اسلام آباد ءِ مچ آملک اکن ماڈل جوڑ کننگ، جناح میڈیکل کمپلیکس و ریسرچ سینٹر نا کاریم ءِ ترند رفتار کننگ، جناح میڈیکل کمپلیکس کن میڈیکل و سرجیکل مشینری و ازباب آتا ہلنگ نا بابت پری کوالیفیکیشن نا عمل ءِ وخت آبناکننگ ناپارت کرے۔ وزیراعظم پارے کہ پری کوالی فیکیشن نا عمل ءِ ماہر کنسلٹنٹ نا چاروکی ٹی پورو کننگے، جناح میڈیکل کمپلیکس نا تعمیراتی کاریم و مشینری و ازباب آتا ہلنگ نا تھرڈ پارٹی آڈٹ ءِ المی کرفنگے۔ وزیراعظم جناح میڈیکل کمپلیکس تون گنڈوک یونیورسٹی کن چارٹر نا منظوری نا عمل نا بناءِ کننگ ناپارت ہم کرے۔ وزیراعظم ءِ پاننگاکہ جناح میڈیکل کمپلیکس ءِ کمپینز ایکٹ انا سیکشن 42 نا رداٹ اسہ کمپنی اسے نا وڑاٹ جوڑ کننگانے، جے ایم سی نا اسٹیئرنگ کمیٹی جناح میڈیکل کمپلیکس نا ماسٹر پلان منظور کرینے، جناح میڈیکل کمپلیکس نا پروجیکٹ مینجمنٹ یونٹ و پروجیکٹ امپلی مینٹیشن یونٹ نا بابت بھرتی تا عمل نا بناءِ کننگانے۔
