پاکستان اٹی یواین ڈی پی نا ڈٹ آتیکن جوان ڈٹ بندی، شفاف رپورٹنگ و قومی شونداری ہدف آتون ہم گرنچی المی ءِ، بنجائی وزیر خزانہ و محصولات

اسلام آباد۔ 27 جنوری (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ اقوام متحدہ نا شونداری ادارہ (یواین ڈی پی ) نا پاکستان اٹی ڈٹ اہمیت تخک، دا ڈٹ آتیکن جوان ڈٹ بندی، شفاف رپورٹنگ و قومی شونداری ہدف آتون ہم گرنچی المی ءِ۔ اوداہیت ءِ دوشنبے نادے آ داڑےپاکستان اٹی یواین ڈی پی نا ریزیڈنٹ نمائندہ ڈاکٹر سیموئیل رزک اتون گپ وتران کرساپارے۔ اوڑدہی ٹی یواین ڈی پی نا برجاڈٹ و پاکستان اٹ السی و نجی بشخ آتون کمکاری آ گپ تران کننگا۔ ڈاکٹر سیموئیل رزک یواین ڈی پی نا چندی بشخ آتیٹی برجاسرجزآتا سرجمی اٹ جاچ پیش کرے، ہرافتے ٹی راجی شونداری، چاگڑدی لچک، توانائی نا گدریفنگ، ڈیجیٹل بدلی و السی بشخ اٹی کارکڑدءِ گچین کننگ اوار ءِ۔ داگام گیج آتا مسخت پائیدار شونداری ءِ مون آدننگ، چاگڑدی بدلی تا برخلاف پاکستان نا مزاحمت و لچک ءِ گچین کننگ و مریس مدی راجی و اقتصادی شونداری ءِ پک کننگ ءِ۔ سینیٹر محمد اورنگزیب یواین ڈی پی ڈٹ آتااہمیت ءِ امنا کرسا زور شاغا کہ دا ڈٹ آتیکن جوان ڈٹ بندی، شفاف رپورٹنگ و قومی شونداری ہدف آتون ہم گرنچی المی ءِ۔ اوپارے کہ داوڑنا ڈٹ آتا سرسہبی نا سیبو اونا پورو وڑاٹ زرکاری نا قابل ، بینک انا آب آتا رداٹ و جہانی آب انا رداٹ چاروکی و رپورٹنگ اٹی ءِ۔