وزیراعظم شہباز شریف نا انسانی اسمگلنگ نا توننگ کن کانودی فریم ورک ءِ پین سوگو کننگ نا پارت

اسلام آباد۔ 27 جنوری (اے پی پی) وزیراعظم محمد شہباز شریف انسانی اسمگلنگ ناتوننگ کن کانودی فریم ورک ءِ پین سوگو کننگ و فیڈرل پراسیکیوشن ایکٹ 2023 آ عملدرآمد ءِ ترند کننگ نا پارت کرسا پارینے کہ انسانی اسمگلر آتا دزگیری و استغاثہ کن درکار تعلقدار عملہ نا دوئی کننگ ءِ ترند کننگے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ انسانی اسمگلنگ نا توننگ کن جوڑ کروک ٹاسک فورس انا اولیکو دیوان وزیراعظم محمد شہباز شریف نا کماشی ٹی مس۔ دیوان اٹی وزیراعظم انسانی اسمگلنگ نا توننگ کن کانودی فریم ورک ءِ پین سوگو کننگ نا پارت کرساپارے کہ کانودی فریم ورک ءِ پین سوگو کننگ کن وزارت داخلہ وزارت کانود و انصاف تون کمک کے۔ وزیراعظم فیڈرل پراسیکیوشن ایکٹ 2023 آ عملدرآمد ءِ ترند کننگ و ایف آئی اے ءِ پیشن نا ملک انسانی اسمگلر آتا زوت آن زوت حوالگی کن دفترخارجہ ءِ انسانی اسمگلر آتا برخلاف جاست وپاست اٹی جمع کروک معلومداری فراوان کننگ نا پارت کرے۔ اوپارے کہ انسانی اسمگلنگ نا پورو توننگ غٹ ادارہ غاتا اسیجائی کوشست و کمک اٹ ہی ممکن ءِ۔ وزیراعظم انسانی اسمگلنگ اٹی اوار اشتہاری ڈوہدار تا ریڈوارنٹ جاری کننگ نا پارت کرے۔ اوپرمان کرے کہ انسانی اسمگلر آتا دزگیری و استغاثہ کن درکار افرادی قوت نا دوئی ءِ ترند کننگے۔ وزیراعظم پارے کہ مراکش آن پردیسی تا کشتی انا ڈوبینگ انگ نا واقعہ ٹی 27 انسانی اسمگلر آتا درستی راستی ءِ کرسا 5 ءِ دزگیرکننگانے۔ دیوان اٹی بنجائی وزیر اقتصادی امور احدخان چیمہ و تعلقدار ادارہ غاتا بڑزکو آفیسر آک ساڑی ئسر۔