وزیراعظم شہباز شریف نا ریلوائی نا متکن آ نظام ءِ پوسکن آ ٹیکنالوجی آ گدریفنگ ، ریلوائی نا ڈغار تے نجی بشخ انا کمکاری اٹ کاروباری سرجزآتیکن کاریم اٹ اتنگ نا پارت

اسلام آباد۔ 27 جنوری (اے پی پی)  وزیراعظم محمد شہباز شریف ریلوائی نامتکن آ نظام ءِ پوسکن آ ٹیکنالوجی آ گدریفنگ و ریلوائی نا ڈغار ءِ نجی بشخ اانا کمک اٹ کاروباری سرجزآتیکن کاریم اٹ اتنگ نا پارت کرسا پارینے کہ ریلوائی ڈیہہ اٹی خاص وڑاٹ نیامی ایشیائی ملک آتون واپارءِ ودفنگ کن حکمت عملی اس ترتیب ایتے۔ دوشنبے نادے آوزیراعظم میڈیا آفس آن جاری بیان نا رداٹ وزیراعظم داپارت ءِ پاکستان ریلوائی نا بابت دیوان نا کماشی ءِ کرسا کرے۔ دیوان اٹی بنجائی وزیر احسن اقبال، محمد علیم خان، محمد اورنگزیب خان، خواجہ محمد آصف، جام کمال خان ، احدخان چیمہ، سردار اویس لغاری و تعلقدار ادارہ غاتا بڑزکو آفیسر آک بشخ ہلکر۔ دیوان اٹی وزیراعظم ءِ پاکستان ریلوائی نا بحالی و شونداری نا بابت کروک آ گام گیج آتیا حوال تننگا۔ وزیراعظم پارے کہ پاکستان ریلوائی نا ڈغار نجی بشخ انا کمک اٹ کاروباری سرجزآتیکن کاریم اٹ اتنگے، ریلوائی ڈیہہ اٹی خاص کر نیامی ایشیائی ملک آتون واپار ءِ ودفنگ کن حکمت عملی اس جوڑکے۔ اوپارے کہ پاکستان ریلوائی ءِ مسابقتی وڑاٹ مسافر آتے راغب کننگ نا گرج ءِ، پبلک پرائیویٹ پارٹنر شپ انا کمک اٹ پاکستان ریلوائی ٹی مسافر آتے سفر نا گچین خذمت فراوان کننگے۔ وزیراعظم پاکستان ریلوائی ٹی کسبی و باصلاحیت افرادی قوت کاریم اٹ اتنگ، پاکستان ریلوائی نا متکن آ نظام ءِ ساڑی آ دور انا خواست آتار داٹ پوسکن آٹیکنالوجی اٹ بدل کننگ وپاکستان ریلوائی ٹی مال برداری اٹ سفر نا خذمت آتے ہم کٹیا کننگ نا پارت کرے۔ وزیراعظم ءِ حوال اٹی پاننگاکہ 2022نا بھسکار نوکاپ اٹی پاکستان ریلوائی ءِ 10 ارب روپئی نا نسخان مس و 35 دے اسکان پٹڑی زیر آب ئس، پاکستان ریلوائی 2022 نانوکاپ آن پد چندی گام گیج آتے اٹ تینا کارکڑد ءِ گچین کرے و مال برداری ٹی داتم اسکان بنائی خڑچ انا بریبر منافع کٹیاکرینے، ملک اٹی مال برداری نا مارکیٹ اٹی پاکستان ریلوائی نا 8 درسد بشخ ءِ، پاکستان ریلویز نا رائٹ سائزنگ نا عمل اٹی 18 درسد بے گرج عملہ ءِ فارغ کننگانے، پاکستان ریلوائی نا تھرکول نا مواصلاتی ڈٹ آ کاریم ترندی اٹ برجاءِ۔