بنجاھیتہی کار ءِ وزیر ءَ امریکی کانگریس ءِ مالیاتی کمیٹی ءِ باسک الیگزینڈر گرین ءَ گوں گند ءُ نند

ہیوسٹن۔27جنوری  (اے پی پی): بنجاھی وزیر تہی کار محسن نقوی ءَ امریکی کانگریس ءُ کانگریس ءِ مالیاتی کمیٹی ءِ نامداریں باسک الیگزینڈر گرین ءَ گوں گند ءُ نند کتگ ءُ وت مہ وتی مفاد ءِ جیڈھ ءُ پاک امریکہ ءِ سیادی ءِ دیمروئی ءِ جیڈھ آنی سر ءَ گپ ءُ تران کتگ۔ . بنجاھی وزیر تہی کار محسن نقوی ءَ کانگریس ءِ باسک الیگزینڈر گرین ءَ را اوگانستان ءَ چہ ناشرکاری ءُ نفوذ ءِ وئیل آنی بابت ءَ سرپدی دات۔ وزیر تہی کار محسن نقوی ءَ کانگریس ءِ باسک الیگزینڈر گرین ءِ منت گپت کہ آئی ءَ پاکستان ءَ زمین چنڈ ءُ سیلاب ءِ آماچیں مردمانی واستہ دل ءِ جہلانکی ءَ کمک کتگ۔ آئی ءَ فلسطین ءِ جیڈھ ءِ سر ءَ امریکی کانگریس ءِ باسک الیگزینڈر گرین ءِ اصولی موقف ءِ سک باز ساڑات ءُ گوشت کہ آئی ءَ فلسطین ءِ واستہ مھکمیں توار چست کتگ کہ اے ستا کرزیں گپ اِنت۔ آئی ءَ گوشت کہ امریکی کانگریس ءِ باسک الیگزینڈر گرین ءِ نیمگ ءَ فلسطین ءِ ھوالگ ءَ اے رنگیں اصولی موقف ءِ سک باز وش اتک کنگ بوتگ۔ بنجاھی تہی کارانی وزیر محسن نقوی ءَ اے گپ ءِ پدرائی کت کہ پاکستان ءُ امریکہ ءِ نیام ءَ سیادی گرم بوھگ ءَ انت ءُ آیوکیں روچاں پاک امریکہ ءِ سیادی گیش مھکم بنت۔ کانگریس ءِ باسک الیگزینڈر گرین ءَ گوشت کہ آ زوت پدا پاکستان ءِ تر ءُ تاب ءَ کنت آئی ءَ زمین چنڈ ءُ سیلاب ءِ وھد ءَ پاکستان ءِ یکوئی ءِ درشان کنگ ءُ کمک کنگ ءِ واستہ چار رند ءَ پاکستان ءِ تر ءُ تاب کتگ۔ اے موہ ءِ سر ءَ ہیوسٹن ءَ پاکستان ءِ قونصل جنرل محمد آفتاب چوہدری ءُ پاکستانی نسل ءِ نامداریں امریکی کاروباری مردم طاہر جاوید ھم ھوار اتنت۔