اسلام آباد۔25جنوری (اے پی پی): بنجاھی وزیر ءِ اھوالکاری، شنگکاری، راجی میراث ءُ دود ءُ ربیدگ عطا اللہ تارڑ ءَ پاکستان ءِ تہ ءَ وانگ ءُ زانگ ءُ کانود ءِ تہ ءَ لندن یونیورسٹی ءِ بے دروریں کرد ءِ ساڑاتگ ءُ گوشت کہ لندن یونیورسٹی ءِ گریجویٹ مرچی ملک ءِ ھاسیں پڑاں کار کنگ ءَ اَنت، ایشی ءِ تہ ءَ عدلیہ، قانون ءُ سیاست ھوار اَنت لندن یونیورسٹی ءِ وانگ ءُ زانگ ءِ نظام ءَ چہ شرتریں وانگ ءِ تجربہ رس اِیت۔ آئی ءَ اے گپ لندن یونیورسٹی ءِ پیسریگیں نودربراں گوں تران کنان ءَ کت۔ اے موہ ءِ سر ءَ پاکستان ءِ سپریم کورٹ ءِ اولی زالبولیں جج جسٹس عائشہ ملک، لندن یونیورسٹی ءِ وائس چانسلر پروفیسر وینڈی تھامسن ءُ دگہ بازیں مردم ھم ھوار اتنت۔ مراگش ءَ گوں تران کنان ءَ بنجاھی وزیر ءِ اھوالکاری ءَ گوشت کہ آئی ءَ لندن یونیورسٹی ءَ ٹیوٹر ءِ بستار ءَ وتی کار بندات کتگ اے منی کار ءِ بنداتی سال بوتگ اَنت۔ آئی ءَ گوشت کہ یونیورسٹی ءِ درائیں پروگرام آنی تہ ءَ نودربر آنی تہ ءَ تنقیدی فکر، تجزیاتی ءُ قانونی مہارت آنی دیمروئی ءَ را دیم ءَ برتگ۔ لندن یونیورسٹی ءِ گریجویٹ مرچی ملک ءِ کلیتی شعبہ آں کلیتی کرد پیلو کنگ ءَ انت، آہانی تہا بازیں مزنیں قانونی ادارہانی تہا شریک بوتگ انت، عدلیہ ءَ ہوار بوتگ انت ءُ متبادل تنازعات ءِ حل ءِ نظام ءَ شریک بوتگ انت۔ ایشی ءَ ابید لندن یونیورسٹی ءِ بازیں گریجویٹ سیاست ءُ چاگردی کاراں گوں بندوک اَنت کہ ایشانی وتی راج ءِ سرا وتی عزم ءِ درشان اِنت۔ بنجاھی وزیر ءَ گوشت کہ اے درستیں کامیابی آں چہ پدر بیت کہ لندن یونیورسٹی ءَ پاکستان ءِ دیمروئی ءَ مزنیں کردے پیلو کتگ۔ آئی ءَ گوشت کہ اے گپ ءِ زانگ المی انت کہ پاکستان ءَ قانود ءِ پیشہ یک شرپ مندیں بستارے ءِ واھند انت۔ پاکستان ءِ بانی قائداعظم محمد علی جناح ءُ مزنیں شاہزانت ءُ شاعر ڈاکٹر علامہ محمد اقبال ءَ برطانیہ ءِ لینکن ان ءِ مزنیں ادارہ ءَ اے دوئیں مزنیں شخصیتاں وتی قانونی مہارت ءُ سیاسی زانت ءِ وسیلہ ءَ وانگ ءُ زانگ کتگ۔ پاکستان ءِ جوڑ کنگ ءُ آئی ءِ آیوکیں وھد ءِ تہ ءَ کرد پیلو کتگ۔ اے گپ ءَ چہ پدر بیت کہ قانونی مہارت یک ملکے ءِ بُن ھشتانی تہ ءَ مزنیں کردے پیلو کنت۔ آئی ءَ گوشت کہ لندن یونیورسٹی ءِ alumni نیٹ ورک گوستگیں بازیں دہائی آنی تہ ءَ مدام دیمروئی کنگ ءَ اِنت، ءُ امیت اِنت کہ آیوکیں وھد ءَ اے گیش دیمروئی کنت۔ بنجاھی وزیر اطلاعات ءَ روٹس اسکول سسٹم ءِ سی ای او ڈاکٹر خدیجہ ءَ را وانگ ءُ زانگ ءِ شوبگ ءَ آئی ءِ جوانیں ازمت آنی سر ءَ شگر ءُ منت گپت کنان ءَ گوشت کہ زالبولیں رہشون آنی دیم ءَ آیگ دلبڈی ءِ گپ اِنت کہ زالبول رہشونی ءِ کرد ءَ پیلو کنگ ءَ اَنت۔ جتا جتائیں پڑاں کرد پیلو کنگ ءَ اَنت۔ آئی ءَ گوشت کہ مئے چاگرد ءَ زالبول زند ءِ بنداتی وھد ءَ چہ مشکلات ءِ آماچ بیت ۔ عطا اللہ تارڑ ءَ لندن یونیورسٹی ءَ چہ زالبولیں گریجویٹ آنی کساس ءِ تہ ءَ گیشی ءِ سر ءَ وشی ءِ درشانی کت ءُ گوشت کہ لندن یونیورسٹی ءِ وانگ ءُ زانگ ءِ نظام ءَ چہ جوانیں وانگ ءِ تجربگ رس ایت، ایشی ءَ چہ نودربر پیشہ وارانہ پڑ ءَ سوبمند بوھگ ءَ کمک رسیت۔ اے موہ ءِ سر ءَ بنجاھی وزیر ءِ اھوالکاری ءَ لندن یونیورسٹی ءِ مزنیں پروفیسر ءُ استاد آناں شگر ءُ منت گپت۔
