اسلام آباد۔24جنوری (اے پی پی): مزن وزیر محمد شہباز شریف ءَ پاکستان ءَ انسانی شپوکی کنگ ءُ سوداگری ءِ تہ ءَ ھواریں گلانی ھلاپ ءَ جنگ ءِ واستہ ھاسیں ٹاسک فورس ءِ جوڑ کتگ ءُ جار جتگ کہ سرکار انسانیت ءِ کشندہ آناں کیس ءِ دیم ءَ کاریت۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءِ سروکی ءَ بنی آدمی آنی شپوک کنگ ءِ ساھت ءَ لڈ ءُ باری مردم آنی پریں بوجی ءِ بڈ ورگ ءِ وئیل ءِ ھوالگ ءَ ھپتگی دیوان برجم دارگ بوتگ۔ مزن وزیر محمد شہباز شریف ءَ پاکستان ءَ انسانی دزگیری ءَ گوں بندوکیں گلانی ھلاپ ءَ جنگ ءِ ھاترا ھاسیں ٹاسک فورس جوڑ کتگ اے ٹاسک فورس ءِ سروک مزن وزیر وت بیت۔ مزن وزیر ءَ جزم ءِ درشان کت کہ انسانی دزگیری ءَ ہمگرنچیں انسانیت ءِ کشندہ آناں کیس ءِ دیم ءَ آرگ بیت۔ آئی ءَ ہدایت کتگ کہ انسانی سوداگری ءِ تہا ہواریں گلانی دزگیری ءَ را ترند کنگ بہ بیت، ءُ وزارت ءِ درئی کار ءَ ھوار درستیں ادارہ انسانی سوداگری ءِ پجارینگ ءِ تہا وتی سرجمیں کرد ءَ پیلو بہ کن انت۔ مزن وزیر ءَ گوشت کہ من ءَ ھوار سرجمیں راج ناجائزیں مہاجرین ءِ سواریں لانچ ءِ سر ءَ پاکستانی آنی بیرانی ءِ دل توریں واکیہ ءَ چہ دلپدرد اِنت۔ مزن وزیر ءَ را گند ءُ نند ءَ ناجائزیں مہاجر ءِ کشتی آنی تہ ءَ پاکستانی آنی بیرانی ءِ تہ ءَ ھواریں گل، پاکستان ءَ جتا جتائیں ادارگ آنی نیمگ ءَ دزگیر کنگ، ایف آئی آر ءُ آیوکیں وھد ءِ کارروائی آنی بابت ءَ سرجمیں بریفنگ دیگ بوت۔ مزن وزیر ءَ را گوشت کہ انوگ ءَ تاں 6 منظم انسانی سوداگری گل آنی پجار کنگ بوتگ، 12 ایف آئی آر درج کنگ بوتگ، 25 ھواریں مردم آنی پجار کنگ بوتگ، 3 کلیدی مردم دزگیر کنگ بوتگ، 16 مردم پاسپورٹ کنٹرول لسٹ ءَ ھوار کنگ بوتگ اَنت۔ دیوان ءَ گاڑی، بینک اکاؤنٹ ءُ اثاثہ آنی ضبطی ءِ ھال آنی ھوالگ ءَ ھم سرپد کنگ بوت۔ دیوان ءَ ایف آئی اے ءِ شکی ئیں کارندہ ءُ افسر آنی دزگیری ءُ کارروائی آنی ھوالگ ءَ ھم سرپد کنگ بوت۔ دیوان ءَ اے درگت ءَ درملک ءَ شتگیں پٹ ءُ پولی کمیٹی ءِ رپوٹ ءِ بابت ءَ ھم سرپد کنگ بوت۔ مزن وزیر ءَ اے ھم ہدایت کت کہ انسانی بہا کنگ ءِ ٹولی آنی پجار کنگ بہ بیت ءُ آہاں مثالی سزا دیگ بہ بیت۔ دیوان ءَ بنجاھی وزیر خواجہ محمد آصف، اعظم نذیر تارڑ، احد خان چیمہ، عطاء اللہ تارڑ، معاون خصوصی طارق فاطمی ءُ ہمگرنچیں مزنیں کارندہ آں بہر زرتگ۔
