اسلام آباد۔ 24 جنوری (اے پی پی) پاکستان و آذربائیجان نا نیام اٹ ہشت می اسیجائی کمیشن دیوان جمعہ نادے آ اڈہلک۔ پاکستان نا کنڈآن وزیردفاع خواجہ آصف و آذربائیجان نا کنڈآن وزیر دفاعی صنعت وگار مصطفیٰ یاؤ دیوان نا کماشی ءِ کننگ ءِ۔ ترجمان اقتصادی امورنار داٹ دیوان بناکننگ آن مست ہڑتوم آ راہشون تا ون آن ون اوڑدہی ہم مس، دیوان اٹی چندی بشخ آتیٹی کمکاری ءِ مون آ دننگ نا عزم انا درشانی ءِ کننگا۔ بنائی دیوان اٹی ہڑتوم آملک آتا نمائندہ غاک بشخ ہلکر۔کمیشن نا اولیکو دے تکنیکی کہول انا مذاکرات مس ہرافتے ٹی توانائی، ٹرانسپورٹ، واپار و اقتصادی کمکاری، دفاعی صنعت، آئی سی ٹی و ڈیجیٹل گورننس، بینکاری، کشت وکشار و خور انا سیکورٹی، سیل و سوات، گوازی، ورناتا امور، دودوربیدہ، تعلیم و سائنس ، جان جوڑی، ہائیڈرو میٹرولوجی، موسمیاتی بدلی، السی خذمت آتا فراوانی کون آ اہم بشخ آک اوار ئسر۔ ہڑتوم آ ملک آک تین پہ تینی کمکاری نا امور آ گپ وتران کریرو ہڑتوم آکنڈآتا پروٹوکول آتے گڈیکو دروشم اس تننگ اٹ نمان پیش رفت دوئی کریر۔ پاکستان و آذربائیجان نانیام اٹ سوگو تعلقداریک زیات مریرہ ۔ اومستی پارے کہ پروٹوکول آتا گڈیکو منظوری آن پبی نتیجہ دوئی مریک و کمکاری نا پین وارخواہی ودی مریک۔ دادیوان اٹی دفاع، واپار و ایلو اسٹریٹجک بشخ آتیٹی کمکاری ءِ پین سوگو کننگ آ گپ وتران کننگک۔
