24 جنوری (اے پی پی) مزن وزیر محمد شہباز شریف ءَ گوشت کہ پاکستانی ورنا آنی تہ ءَ سرجمیں صلاحیت است انت کہ آ وتی صلاحیت ءَ را ھمک تکءُ پھنات ءَ ثابت بہ کن انت ءُملک ءَ را شان ءُ شان بیار انت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی لندن یونیورسٹی ءِ وائس چانسلر وینڈی تھامسن ءَ گوں گپ ءُ تران کنان ءَ کت آئی ءَ جمعہ ءِ روچ ءَ ادا گند ءُ نند کت۔ مزن وزیر ءَ گوشت کہ پاکستانی شہری لندن یونیورسٹی ءُ ایندگر نامداریں میاں اوستمانی وانگءُ زانگ ءِ ادارگ آنی تہ ءَ وانگ ءُ زانگ ءِ دربرگ ءَ پد گلوبل مارکیٹ ءَ ھاسیں ازمت پیلو کنگ ءَ اَنت۔ پاکستان ءِ حکومت ءَ میرٹ ءِ بنیاد ءَ ورنا آناں اسکالرشپ ءُ نوکری ءِ واستہ درملک ءَ روان دیگ ءِ واستہ بازیں پروگرام بندات کتگ ءُنوکیں حکمت عملی ءِ سر ءَ کار برجاہ اِنت۔ مزن وزیر ءَ گوشت کہ میماں اوستمانی مارکیٹ آنی لوٹ آنی ردا وتی ورنا آناں ھنر مند کنگ ءِ واستہ جزمیگ آں۔ وینڈی تھامسن ءَ مزن وزیر محمد شہباز شریف ءَ را ملک ءَ وانگ ءُزانگ ءِ دیمروئی ءِ ھاتر ءَ گوستگیں وھد ءِ گامگیج آنی پد ءَ شگر ءُ منت گپت۔ گند ءُ نند ءَ وزیر ءِ اھوالکاری ءُ شنگکاری عطا اللہ ترار، وفاقی وزیر اقتصادی امور احد خان چیما ءُ سیادی داروکیں ادارگ آنی مزنیں افسر آں بھر زوری کت۔
