اقوام متحدہ۔ 23 جنوری (اے پی پی) اقوام متحدہ ٹی پاکستان نا سفیر منیر اکرم روانڈا ناوزیرخارجہ اولیو یئر دھونگیرے تون اوڑدہی کرے ہراٹی اوفک افریقہ ٹی انسداد دہشت گردی نا کوشست و عظیم جھیل آتا حامل دا ڈیہہ انا حالیت آتون اوار اوار تین پہ تینی ہڑتوم آ کنڈآتا تعلقداری تا بارواٹی گپ وتران کریر۔ دااوڑدہی چارشنبے نادے آ نیویارک اٹی اقوام متحدہ نا صدر دفتراٹی مس۔ پاکستانی مشن آن جاری بیان رداٹ سفیر منیراکرم پارے کہ اونا ملک ’’افریقی ویل آتا ایسر افریقہ ٹی ‘‘ نا اصول آ سختی اٹ کاربند ءِ و سلامتی کونسل اٹ تینا دورءِ کماشی ٹی اوڑآ قائم سلک۔ اوعلاقائی و جہانی امن ءِ برقرارتخنگ کن گچین کمکاری نا گرج آ زور شاغسا اقوام متحدہ نا امن مشن و افریقی یونین نا کماشی ٹی امن آپریشن تا آخبتی بارواٹی ہم گپ وتران کرے۔ اونا پاننگ ئس کہ پاکستان اقوام متحدہ نا سلامتی کونسل نا قرارداد نمبر 2719نا پبی مخ تفءِ و اودے گچین وڑاٹ نافذ کننگ آ زور شاغک، داقرارداد اٹی افریقی یونین اٹی امن و امداد آتالان آپریشن تیکن اقوام متحدہ نا رداٹ شریداری آ زور شاغنگانے۔ بیان اٹی پاننگانے کہ پاکستان نا تدوک آ دے انا کوشست مچ آ افریقی ڈیہہ اٹی تعمیری شریداری نا مون آ دننگ و امن و سوگوی کن پاکستان نا عزم صمیم نا عکاسی ءِ کیک۔
