اسلام آباد۔22جنوری (اے پی پی) وزیراعظم محمدشہباز شریف چین اٹی کشاری بشخ انا تربیت کن گدریفوک آ طالب علم آتا گچین کاری ٹی شفافیت ومیرٹ ءِ اولیت تننگ نا پارت کرساپارینے کہ پاکستانی طالب علم آتا چین اٹی پوسکن آ کشاری تربیت نا مچ آ خڑچ ءِ حکومتِ پاکستان ہرفک۔ چارشنبے نادے آ وزیراعظم آفس نا میڈیاونگ آن جاری بیان نا رداٹ وزیراعظم محمد شہباز شریف نا کماشی ٹی چین اٹی پوسکن آ کشت وکشار نا تربیت نا دوئی کننگ کن ہنوک آ پاکستانی طالب علم آتا بابت جاچ دیوان مس۔ دیوان اٹی بنجائی وزیر احسن اقبال، رانا تنویرحسین ، احدخان چیمہ، چیئرمین ہائرایجوکیشن کمیشن و تعلقدار بڑزکو کمامدارآک بشخ ہلکر۔ وزیراعظم پورٹل نا کمک اٹ درخواست آتا سکروٹنی ٹی سلیکشن نا آب آ پورو سلوک آ طالب علم آتا غاوتا پوروی کن کمیٹی اس جوڑ کننگ نا پارت کرے و پارے کہ چین پاکستان نا متکن آ سنگت ءِ ہرانا کشاری بشخ اٹی شونداری بے مٹ ءِ۔ تینا دورہ ءِ چین اٹی چینی سرکڑدہ غاتون کشاری بشخ اٹی پاکستانی طالب علم آتا پوسکن آ تربیت نا درخواست کریسن۔ اللہ نا فضل و کرم اٹ بھاز زوت طالب علم آتا اولیکو بیچ کشت وکشار نا بشخ اٹی پوسکن تربیت کن چین آ روانہ مریک۔ وزیراعظم پارے کہ کشاری بشخ انا پوسکن تربیت کن چین آ ہنوک آ طالب علم آتیٹی 10 درسد خصوصی کوٹہ بلوچستان ناطالب علم آتیکن جتا کننگا۔ چینی سرکڑدہ و چینی یونیورسٹی تا منت واراُن کہ اوپاکستانی طالب علم آتے چین اٹ کشت وکشار نا پوسکن تربیت نا موقع تسر۔ دیوان اٹی وزیراعظم ءِ پاننگاکہ کشاری بشخ آن تعلق تخوک آطالب علم آک شفاف وڑاٹ پورٹل نا کمک اٹ درخواست جمع کرفیر۔ 1287درخواست آتیان 711 طالب علم تربیت نا طے کروک آب آ پورو سلیسر۔ داطالب علم آتیٹی بلوچستان و گلگت بلستان نا اومیتدار آک ہم اوار ءُ۔ دیوان ءِ مستی پاننگاکہ دا طالب علم آتے اِرا بیچ آتیٹی چین آ گدریفنگک۔ اولیکو کھیپ اٹی 300 طالب علم آبپاشی ٹی گچینی، ساہدار تیٹی ناجوڑی نا تشخیص و چاروکی، ساہدار تا افرائش نسل و پوسکن آ جینیات و پوسکن آ بج آتا تیاری و اوفتا پروسیسنگ نا بشخ آتیٹی تربیت کن گدریفنگک۔ طالب علم آتا اولیکو کھیپ مارچ 2025 اٹی چین آ روانہ مریک۔ دیوان ءِ مستی پاننگانے کہ 400 طالب علم آتا ارٹ میکو کھیپ برجاسال انا نیام اٹ چین آ گدریفنگک ہرا کشت وکشار اٹی پوسکن آ مشینری تا کاریم اٹ اتنگ، فصل آتا ترندی اٹ افزائش، کشت وکشار اٹی پوسکن آ ٹیکنالوجی بشمول مصنوعی ذہانت نا کاریم اٹ اتنگ و میوہ و سوزی تا پروسیسنگ نا بشخ آتیٹی تربیت تننگک۔
