وزیر واپار جام کمال خان نا کمبوڈین سینیٹ نا چیئرمین ہن سین تون اوڑدہی

اسلام آباد۔ 21جنوری (اے پی پی) بنجائی وزیر واپار جام کمال خان تینا سرکاری دورہ ءِ کمبوڈیا ٹی کمبوڈین سینیٹ نا چیئرمین ہن سین تون اوڑدہی کرے۔ اوڑدہی ٹی ہڑتوم آ کنڈآتا تعلقداری تے سوگو کننگ و پارلیمانی سفارت کاری نا مون  آ دننگ آ گپ وتران کننگا۔ وزارت نا جاری اعلامیہ نا رداٹ تدوک آ دے مروک  آ اوڑدہی ٹی وزیر واپار جام کمال خان اوڑدہی ٹی پاکستان اٹی کمبوڈین سفارت خانہ نا جوڑ کننگ نا سلاہ پیش کرے تانکہ ہڑتوم آ ملک آتا نیام اٹ سفارتی تعلقداری ءِ پین مون آ دننگ مرےو واپاری و دودوربید ہ ئی تعلقداری تے سوگو کننگ مرے۔ وزیر واپار چیئرمین ہن سین ءِ اول اسیجائی واپاری کمیٹی دیوان نا بارواٹی معلومدار کرے و اودے پاکستان اٹی مروک آ بروک آ دیوان اٹی کمبوڈین کاروباری برادری اتون بشخ ہلنگ نا سلہ خلک۔ چیئرمین ہن سین پدتموک ملک آتا نیام اٹ کمکاری نا اہمیت آ زور شاغسا پارے کہ پدتموک ملک آک اسہ ایلو نا فائدہ غاتیکن اواری اٹ بایدے کاریم کیر و تین پہ تینی واپارءِ مون آ دیر۔ جام کمال خان دے ٹکی ڈیہہ انا ترندی اٹ شون ہلوک زرگزران تے مون آتخسا پارے کہ دا ہڑتوم آملک آتیکن کمکاری نا گچین وارخواہی فراوان کیک۔ اوپڑوکرے کہ پاکستان زوت کمبوڈیاٹی تینا واپاری سیکشن اس ملک تانکہ واپاری تعلقداری تے ودفنگ مرے و کاروباری برادری نا نیام اٹ کمکاری ءِ مون آ دننگ مرے۔ داکان بیدس، چیئرمین ہن سین پاکستان و کمبوڈیا نا نیام اٹ دوہرے خراج نا معاہدہ غا سجفنگ نا سلاہ خلک، ہراہڑتوم آ ملک آتیٹی کاریم  کروک آکاروبارتیکن خراج نا اڑاند آتے چٹفک و زرکاری ءِ مون آدیک۔ دااوڑدہی پاکستان و کمبوڈیا نا تعلقداری تے سوگو کننگ نا سمت اسہ اہم ءُ پیش رفت اس جوڑمریک، ہراڑے ہڑتوم آ فریق آک سفارتی، اقتصادی و پارلیمانی کمکاری ءِ ودفنگ نا عزم انا درشانی ءِ کریر۔