اسلام آباد۔ 21 جنوری (اے پی پی) وزیراعظم محمد شہباز شریف غزہ ٹی جنگ بندی نا خیرمقدم ءِ کرساپارینے کہ پاکستان غزہ نا پوسکن تفنگ نا ریسہ غاتیٹی ہرممکن کڑد ادا کیک، گوادر پاکستان نا شونداری کن مزل نا نشان نا حیثیت تخک، پاکستان نا غٹ آن بھلا بالی پٹ انا بناستاکڑزک، اخلاص، خواری و ٹیم ورک اٹ پاکستان نا زرگزران ءِ سوگو کینہ۔ سے شنبے نادے آ بنجائی کابینہ نا دیوان آن تران کرساوزیراعظم پارے کہ غزہ ٹی بھلو خونریزی و بھسکاری آن پد 42 دے اکن جنگ بندی مسنے، دعاءِ کہ دا جنگ بندی آخبتی مرے، 50 ہزار آن زیات فلسطینی لمہ، ایڑھ، بزرگ، چناک ، ورناک، انجینئرو ڈاکٹرآک داٹی شہید مسنو و شارتا شارآک بھس مسنو، پاکستان تینا فلسطینی ایلم تاآجوئی و غزہ ٹی جنگ بندی کن پبی توار بڑز کرینے، نن فلسطینی تا امداد و ریلیف کن تینا بشخ ءِ شاغان، پوسکن تفنگ نا ریسہ نا بناکننگ آ تینا ہرممکن کڑد ءِ ادا کینہ، داننافرض ءِ ہرادے اللہ نا رضاکن پورو کینہ۔ وزیراعظم گوادر بالی پٹ انا باضابطہ آپریشنل مننگ ءِ ستاکڑزوک گوندسا پارینے کہ دا ڈٹ چین انا 230 ملین ڈالر نا خڑچ آن پورو مس، گوادر بالی پٹ پاکستان نا غٹ آن بھلا بالی پٹ شمار مریک اگہ دا کمرشل بنداوتیا آپریٹ مریک تو بلوچستان و پاکستان نا زرگزران کن بھاز اہم مریک۔ وزیراعظم پارے کہ ہرافک پاکستان دشمنی آ بسنو و کشت وخون نا بازار ءِ گرم کرینو اوفک داہیت ءِ جوان چار کہ داکشت وخون آن نئے بیرہ بلوچستان نا الس ءِ نسخان مننگ ءِ بلکن دا پاکستان نا الس تون ہم اسُل دشمنی اسے، چین کون آ سنگت ہرا تینا وسیلہ غاتے اٹ پاکستان ءِ د اٹیکی ءِ تسنے، نا قدر ءِ بایدے کننگے، کراچی نا بندرگاہ مہالو آن بھاز مصروف ءِ و ہموڑے ہن و بر نا بھاز بھاریم ءِ۔ وزیراعظم پارے کہ گوادر پاکستان نا شونداری ٹی مزل نا حیثیت تخک دانا برخلاف جنگ و جھیڑہ پاکستان دشمنی ءِ۔ وزیراعظم جہانی بینک انا مریس مدی شریداری فریم ورک ءِ ستاکڑزوک گوندا ہرانا رداٹ بروک آ دہ سال اٹی 20 ارب ڈالر نا زرکاری مریک۔ وزیراعظم پارے کہ موسمیاتی بدلی و راجی بشخ اکن دا وام آن ننا راجی بشخ انا زرگزران ءِ سوگوی ملک، نن دانا بایدے خیرمقدم ءِ کین و دانا کسر اٹ بروک اڑاند آتے مُرکین۔ اوپارے کہ آئی ٹی نا برآمد آتیٹی پدریسہ ودکی مننگ ءِ، دسمبر 2024 اٹی برآمد آک غٹ آن زیات (348ملین ڈالر) مسنو ہرا ستاکڑزک۔ وزیراعظم آئی ٹی نا وزارت و تعلقدار کمامدارآتے شاباشی ترسا پارے کہ ننے آئی ٹی نا بشخ اٹی پین مون آ ہنوئی ءِ۔ وزیراعظم پارے کہ زرگزرانی ٹک آک ستاکڑزوک و داہیت انانشانی ءُ کہ نن خواری، اخلاص وٹیم ورک اٹ پاکستان نا زرگزران ءِ سوگو کینہ۔ اوتوانائی نا وزارت ءِ الیکٹرانک گاڈی تا بابت جوان ءُ پروگرام اسے آہم شاباشی تس۔ وزیراعظم پارے کہ برجاسال حاجی تے زیات آسراتی فراوان کننگک و اوفتا گچین وڑاٹ خیال ءِ تخنگک و راہشونی ءِ کننگک۔ وزیراعظم فتنۃ الخوارج آتا چٹفنگ کن قربانی تے خراج عقیدت پیش کرساپارے کہ داقربانی تا اخس کہ تعظیم ءِ کننگے کم ءِ، قوم دا قربانی تا قرض ءِ تننگ کپک۔
