بنجائی وزیر داخلہ محسن نقوی نا واشنگٹن اٹی خصوصی سُوارہ ٹی بشخ ہلک

واشنگٹن۔ 21 جنوری (اے پی پی) بنجائی وزیر داخلہ محسن نقوی واشنگٹن اٹی لنکن لبرٹی بال انا خصوصی سُوارہ ٹی بشخ ہلک، ہراڑے اودے جم وجوش اٹ بخیرکننگا۔ داوخت  آ وزیرداخلہ امریکی سینیٹر، کانگریس نا باسک و ایلو اہم شخصیت آتون اوڑدہی کرے۔ محسن نقوی سُوارہ ٹی سینیٹر ٹومی ٹیوبرویل، کانگریس نا باسک کین کلورٹ، مسکوہی برطانوی وزیراعظم لزٹراس و گورنر مسی سیپی فلپ برینٹ تون اوڑدہی کرے۔ دااوڑدہی تیٹی تین پہ تینی است خواہی نا امور و ہڑتوم آ کنڈآتا تعلقداری آ گپ وتران کننگا۔ وزیرداخلہ سُوارہ ٹی امریکی سینیٹر و کانگریس نا باسک آتے ڈونلڈ ٹرمپ نا کنڈآن صدارت نا عہدہ ءِ سنبھالنگ آ مبارکباد پیش کرے و امریکی الس کن نیک است خواہی نا درشانی ءِ کرے۔ وزیرداخلہ محسن نقوی پارے کہ اینو امریکہ کن اسہ تاریخی ءُ دے اسے۔ای خنانٹ کہ امریکی الس ڈونلڈ ٹرمپ نا صدارت نا ارٹ میکو مد انا بنانا بھاز جوان وڑاٹ خیرمقدم ءِ کرینو۔ اومستی پارے کہ صدر ڈونلڈ ٹرمپ نا دور اٹی پاکستان و امریکہ نا تعلقداری نا اسہ پوسکن ءُ بشخ اس بناکیک۔ داوخت آ بنجائی وزیر داخلہ امریکی الس کن مہرومریبت و نیک است خواہی تا درشانی ءِ کرے و ہڑتوم آ ملک آتا نیام اٹ سوگو تعلقداری نا عزم انا درشانی ءِ کرے۔