کوئٹہ۔ 20 جنوری (اے پی پی) چیف سیکرٹری بلوچستان شکیل قادر خان پارینے کہ ورناک ہرقوم انا سرمایہ ءُ، و اوفتا شونداری ہرڈیہہ انا شونداری نا ضمانت ءِ، بی آرایس پی و پاکستان پاور ٹی ایلیویشن فنڈ انا کنڈآن ہیلکاری پروگرام بلوچستان نا ورناتیکن اسہ اہم ءُ موقع اسے داوڑنا ڈٹ ورناتے زرگزرانی وڑاٹ وتواجہ جوڑ کننگ اٹ اہم کڑد ادا کیک۔ داہیت ءِ او دوشنبے نادے آ بلوچستان رورل سپورٹ پروگرام (بی آرایس پی) و پاکستان پاورٹی ایلیویشن فنڈ(پی پی اے ایف) نا تین پہ تینی شریداری اٹ آئی آرایم اٹ تربیت دوئی کروک آ ورنامار و مسن تیٹی سرٹیفکیٹ و ٹول کٹس، لیپ ٹاپ بشخنگ نا دود آن تران کرساپارے۔ دود اٹی بی آرایس پی نا چیف ایگزیکٹیو آفیسر ڈاکٹر طاہر رشید، چیئرمین بی آرایس پی ملک انور سلیم کاسی و پی پی اے ایف نا صوبائی کوآرڈی نیٹر ڈاکٹر عبدالرحمان تون اوار عالم دین، سول سوسائٹی و چندی مکتبہ فکر آن تعلق تخوک آ بندغ آک بشخ ہلکر۔ چیف سیکرٹری بلوچستان شکیل قاد رخان پارے کہ ورناک ہرقوم انا سرمایہ ءُ واوفتان شونداری ہرڈیہہ انا شونہالی نا ضمانت ءِ۔ اوداہیلکاری پروگرام ءِ بلوچستان نا ورناتیکن اسہ اہم ءُ موقع اس گوندسا پارےکہ داوڑناڈٹ ورناتے زرگزرانی وڑاٹ وتواجہ جوڑکننگ اٹ اہم کڑد ادا کیک۔ اوزور شاغا کہ حکومت بلوچستان ہموغٹ گام گیج آتاپورو مخ تفی ءِ برجاتخک ہرا السی آسودہی و شونداری کن ترتیب تننگر۔ چیف سیکرٹری بشخ ہلوک آتیا زور شاغا کہ او داتربیت آن پبی فائدہ ہرفر۔ چیف سیکرٹری بی آرایس پی و پی پی اے ایف نا مچ آ ٹیم ءِ خراج تحسین پیش کرے و داہیت انا باوری کرفے کہ حکومت و الس نا شریداری اٹ بلوچستان ءِ شونداری نا کنڈآ دننگ مریک ، بی آرایس پی نا چیف ایگزیکٹیو آفیسر ڈاکٹر طاہر رشید تینا تران اٹی داہیت آ زور شاغا کہ بلوچستان اٹی ورناتے کسب کار کننگ واوفتے واکدار کننگ اسہ اہم ءُ گرج اسے تانکہ او معاشرتی و اقتصادی شونداری ٹی فعال کڑد ادا کننگ کیر۔
