وزیراعظم نا سی ڈی اے ءِ جوائنٹ وینچر و پبلک پرائیویٹ پارٹنر شپ انا کمک اٹ پوسکن آ آسراتی تیان شُپ ہوٹل آتا تفنگ کن جوان ءُ رپورٹ اس پیش کننگ ناپارت

اسلام آباد۔ 20 جنوری (اے پی پی) وزیراعظم محمد شہباز شریف سی ڈی اے ءِ جوائنٹ وینچر و پبلک پرائیویٹ پارٹنر شپ نا کمک اٹ پوسکن آ آسراتی تیان شُپ پوسکن آ ہوٹل آتا تفنگ کن جوان ءُ رپورٹ اس پیش کننگ نا پارت کرساپارینے کہ پاکستان اٹ جہانی کانفرنس و ایلو سرجزآتا اڈتننگ کن ہوٹل، ہسپتال و ایلو آسراتی تے پین گچین کننگ نا گرج ءِ۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی سی ڈی اے ناامور نا بابت جاچ دیوان اس اڈہلک۔وزیراعظم اسلام آباد اٹی ساڑی آ جہانی کانفرنس و ایلو دود آتا سرسہب اڈتننگ نابابت سی ڈی اے نا کارکڑد انا ستاءِ کرے۔ وزیراعظم پارے کہ پاکستان اٹ جہانی کانفرنس آتا بناء سفارتی پڑآ ننا سرسہبی نا سند ءِ، پدریسہ خواری اٹ سنگت ملک آتا پاکستان  آ پت بحال مس۔ اوپارےکہ پاکستان اٹ جہانی کہول انا کانفرنس و ایلو سرجزآتا اڈتننگ کن ہوٹل، ہسپتال و ایلو آسراتی تے پین گچین کننگ نا گرج ءِ، پوسکن آسراتی تا فراوانی آن ملک اٹی سیل و سوات ءِ مون آ دننگک۔ وزیراعظم سی ڈی اے ءِ پارت کرے کہ جوائنٹ وینچر و پبلک پرائیویٹ پارٹنر شپ انا کمک اٹ پوسکن آآسراتی آن شُپ پوسکن آ ہوٹل آتا تفنگ کن جُوان رپورٹ پیش کننگے، سنگت ملک آتیان بروک آمہمان تیکن جہانی آب انا آسراتی نا فراوانی ءِ پک کننگے۔ وزیراعظم سی ڈی اےءِ اسلام آباد نا ہنکینی تیکن آسراتی تےپین گچین کننگ نا ہم پارت کرے۔ وزیراعظم ءِ پاننگاکہ اسلام آباد اٹی غیرفعال نہادی سرکاری ملکیت آتا بحالی و پوسکن آ ہوٹل آتا تفنگ نا بابت پری۔فزیبلٹی رپورٹ تیار مسنے۔ دیوان اٹی بنجائی وزیر اقتصادی امور احدخان چیمہ، چیئرمین سی ڈی اے و  تعلقدار ادارہ غاتا بڑزکوآفیسر آک ساڑی ئسر۔