حج 2025نا تیاری ٹی ڈیوالئی ءِ سگنگ پننگک، کمکارآتا گچین کاری ٹی شفافیت و میرٹ ءِ مون آ تخنگے، وزیراعظم

اسلام آباد۔ 20 جنوری (اے پی پی) وزیراعظم محمد شہباز شریف حاجی تے ہروڑنا کمکاری و آسراتی نا فراوانی ءِ پک کننگ نا پارت کرسا پارینے کہ حج 2025 نا تیاری ٹی ڈیوالئی ءِ سگنگ پننگک، حاجی تیکن کمکارآتا گچین کاری نا وڑوڈول آتیٹی شفافیت و میرٹ ءِ مون آ تخنگے۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم دوشنبے نادے آ داڑے حج 2025 نا تیاری تا چرجوئی ٹی جاچ دیوان نا کماشی ءِ کرساکرے۔ دیوان اٹی بنجائی وزیر احدخان چیمہ، چوہدری سالک حسین و تعلقدار بڑزکو کمامدارآک بشخ ہلکر۔ دیوان اٹی وزیر اعظم ءِ حج 2025 نا تیاری تیا سرجمی اٹ حوال تننگا۔ دیوان ءِ پاننگاکہ تدوک آ سال آنبار داسال ہم حاجی تے سم آتا فراوانی ءِ پاکستان آن کننگک و حاجی تا کمکاری کن حج موبائل ایپلی کیشن ہم فعال ءِ۔ دیوان ءِ حج فنڈ آ پیش رفت آن معلومدار کرساپاننگاکہ داڑآ کاریم گڈیکو ریسہ غاتیٹی ءِ۔ دیوان اٹی وزیراعظم پارے کہ حج 2025 نا تیاری ٹی لاپرواہی ءِ منپنہ۔ حج 2025 اٹی حاجی تے ہروڑنا کمک و آسراتی ءِ پک کننگے۔ حج 2025 نا تیاری تا بابت اسہ جوان ءُ حوال اس تیار کرسا بروک آ منہ دے اٹی پیش کننگے۔ حاجی تے حج 2025 نا بابت تربیت نا گچین آسراتی فراوان کننگے۔ وزیراعظم حج ڈیوٹی آ جوان شہرت نا قابل آفیسر آتے تعینات کننگ نا پارت کرے۔ وزیراعظم پارے کہ حاجیک اللہ نا مہمان ءُ، حکومت نا کنڈآن اوفتا خذمت و کمکاری ٹی ڈیوالئی ءِ منپرہ۔ وزیراعظم پارت کرے کہ حاجی تا ہنکین، سفری و ایلو آسراتی تا خاص خیال ءِ تخنگے۔ حاجی تیکن کمکارآتا گچین کاری نا وڑوڈول اٹی شفافیت  ومیرٹ ءِ مون آتخنگے۔