گوادر۔ 20 جنوری (اے پی پی) نیو گوادر انٹرنیشنل بالی پٹ پروجیکٹ (این جی آئی اے پی ) آن آپریشن بناکرے، پی آئی اے نا گوادر کن اولیکو کمرشل جہاز پی کے۔ 305 کراچی آن 46 مسافر آتے ہرفسا نیوگوادر انٹرنیشنل بالی پٹ آ سرمس۔ پاکستان ایئرپورٹس اتھارٹی نا کمامدارآک پارینو کہ دا ڈٹ فعال مسنے، چین۔ پاکستان اقتصادی راہداری(سی پیک) نا اسہ فلیگ شپ ڈٹ اسے ہرا آپریشنل مسنے۔ دا مزل پاکستان نا ہوابازی نا بنداوی پنجر ءِ گچین کننگ و علاقائی رابطہ غاتے سوگو کننگ نا کنڈآ اہم ءُ گام اسے۔ پی آئی اے نا اولیکو جہاز پی کے۔ 305 کراچی آن 46 مسافر آتے ہرفسا گوادر آسرمس۔ جہاز انا لینڈنگ اتون ہی واٹر باؤزر نا کمک اٹ سلامی پیش کننگا۔ جہاز ہندی وخت انا رداٹ 11 بجہ ءُ 15 منٹ آ پوسکن آ گوادر بالی پٹ آ اولیکو کمرشل جہازانا حیثیت اٹ لینڈکرے۔ وزیردفاع و ہوابازی خواجہ محمد آصف، گورنر و وزیراعلیٰ بلوچستان تون اوار تاریخی جہاز انا مسافر آتے جم وجوش اٹ بخیرکرینو۔ داپروجیکٹ پوسکن آ بالی پٹ انفراسٹرکچر ناحامل ءِ، ہرانا سالانہ گنجائشت 4 لکھ مسافر آتا ءِ، 3.6 کلومیٹر مریس رن وے، ہرا بھلا جہاز دُن کہ بوئنگ 747 و ایئربس A380ءِ آسراتی فراوان کننگ نا قابل ءُ۔ پوسکن آ ایئرٹریفک کنٹرول سسٹم و نیوی گیشنل ایڈز، پوسکن آ سیکورٹی خصوصیت و مسافر آتے آسراتی فراوان کننگانے۔ نیوگوادر انٹرنیشنل بالی پٹ ضلع گوادر، بلوچستان نا علاقہ گرانڈانی ٹی اسٹریٹجک وڑاٹ واقع ءِ و کم و ود 4،300 یکڑ نا رقبہ غا تالان ءِ۔ دا ڈٹ کم و ود 246 ملین امریکی ڈالر نا خڑچ آن تیار کننگانے، ہرانا فنڈنگ حکومت ءِ پاکستان، پاکستان ایئرپورٹس اتھارٹی، سلطنت عمان و حکومت ءِ چین نا گرانٹ آن کننگانے۔ دا ڈٹ انا بنداو ءِ نومبر 2019اٹی تخنگا و پورودسمبر 2024اٹی مسنے۔ نیوگوادر انٹرنیشنل بالی پٹ داسہ پورو وڑاٹ آپریشنل ءِ، ہراڑے غٹ المی بنداوی پنجر، سسٹم و عملہ ساڑی ءِ تانکہ ملکی و جہانی جہاز آتے آسراتی فراوان کننگ مرے۔ دا ڈٹ پاکستان وچین نا سوگو سنگتی نا شاہدی و سی پیک نا اسہ اہم ءُ جزو اسے، ہرا اقتصادی شونداری، علاقائی رابطہ و السی رابطہ غاتے مون آ دننگ کن جوڑ کننگانے۔
