اسلام آباد۔ 20 جنوری (اے پی پی) بنجائی وزیر خزانہ سینیٹر محمد اورنگزیب جہانی اقتصادی فورم 2025نا سالانہ دیوان اٹی بشخ ہلنگ کن سوئس شار ڈیووس آ روانہ مس۔ وزیرخزانہ محمد اورنگزیب 20 آن 24 جنوری اسکان برجاسلوک آ جہانی اقتصادی فورم اٹی بشخ ہلنگ اٹی چندی ملک و جہانی ادارہ غاتا سیاسی، واپاری و کاروباری راہشون تتون اوڑدہی کیک۔ وزیر خزانہ دورہ ٹی چندی نشست و مذاکرہ غاتیان تران اٹی ملک انا زرگزرانی منظرنامہ ءِ پیدوار کیک۔ او فورم اٹی پدتموک زرگزران تیا جہانی وام تا ودوک آ بھاریم نا سرحال آ اسہ بڑزکو کہولی مذاکرہ سے ٹی بطور پینلسٹ شریک مریک۔ وزیرخزانہ تینا گپ وتران اٹی مالیاتی پالیسی تیٹی بدلی و وام تیٹی پائیداری نا کمک اٹ سوگو و لچکدار زرگزران تا اڈتننگ آ نقطہ نظرءِ بیان کیک۔ وزیرخزانہ فورم اٹی واپار و زرکاری نا مون آ دننگ اٹ پوسکن آ ٹیکنالوجی خاص وڑاٹ اے آئی و خودکاری نا انقلاب آفرین اثرآتیا اسہ بڑزکو کہول انا مذاکرہ سے ٹی ہم بطور پنلسٹ بشخ ہلیک۔ وزیرخزانہ ٹیکنالوجی تا کاریم اٹ اتنگ آن سہی و کٹیائی واپار و زرکاری نا دوئی کننگ نا چندی پلو آتیا گپ وتران کیک۔ دورہ ٹی وزیرخزانہ سینیٹر محمد اورنگزیب سعودی عرب، مصر و قطر انا وزیر آتون اوڑدہی کیک۔ فورم اٹی بشخ ہلنگ اٹی وزیرخزانہ نا جہانی مالیاتی و کاروباری ادارہ، پائیدار شونداری ٹی شریک جہانی تنظیم و زرکار وکمرشل بینک خاص کر دے ٹک نیامی نا زرکاربینک آتا کمامدارآتون ہم اوڑدہی مریک۔ وزیرخزانہ دورہ ٹی پاتھ فائنڈر گروپ انا کنڈآن ’’ڈیجیٹل پاکستان‘‘ و ’’ پاکستان اٹ زرکاری‘‘ نا سرحال آتیا اِرا جتا مذاکراہ غاتیٹی خاص وڑاٹ شریک مریک ۔ وزیرخزانہ محمد اورنگزیب دورہ ٹی گچین جہانی میڈیا نا نمائندہ غاتے انٹرویوہم ایتک۔ جہانی اقتصادی فورم نا 55 می سالانہ دیوان’’سمارٹ ٹیکنالوجی نا دورہ تون ہم گرنچ مننگ کن کمکار ’’نا نعرہ نا رداٹ اڈہلنگ ءِ۔ جہانی اقتصادی فورم نا سالانہ دیوان اٹی چندی سروک مملکت و حکومت، نجی بشخ و سول سوسائٹی نا راہشونک بشخ ہلنگ ءُ۔ نجی بشخ انا اسہ ہزار آن زیات بڑزکو کہولی نمائندہ، ورناراہشون، سول سوسائٹی و تعلیمی ادارہ غاتا نمائندہ غاک ہم فورم اٹی بشخ ہلیرہ۔ فورم اٹی حکومت و بھلا جہانی تنظیم و ادارہ غاتا نیام اٹ چندی اقتصادی و شونداری بشخ آتیٹی شریدار و جہانی کمکاری آ تالان ایسر اس پیش کننگک۔
