اسلام آباد۔ 17 جنوری (اے پی پی) بنجائی وزیرحوالکاری، شینکاری، قومی میرات و دودوربیدہ عطاء اللہ تارڑ پارینے کہ رشوت، کرپشن و ڈاکہ پک مسنے، القادر ٹرسٹ بیرہ بلیک منی ءِ وائٹ کننگ کن جوڑ کننگا، 190 ملین پاؤنڈ میگا کرپشن کیس اٹ مذہب کارڈ ءِ کاریم اٹ اتنگا، ڈیفنس کونسل کیس اتون سیاسی وڑاٹ مون تس، بانی چیئرمین پی ٹی آئی عدالت اٹ پبی شاہدی پیش کننگ اٹ بے سہب مس، بنفوک آ سزا کانود، میرٹ و شاہدی تارداٹ ءِ۔ جمعہ نادے آ داڑے پارلیمنٹ ہاؤس نا پیشن وزیر کانود اعظم نذیر تارڑ تون اوار میڈیا تون گپ وتران کرسا بنجائی وزیر حوالکاری پارے کہ 190 ملین پاؤنڈ پاکستان نا تاریخ نا میگاکرپشن کیس ئس، ڈیفنس کونسل داکیس اتون سیاسی وڑاٹ مون تس، فیصلہ ٹی ہم پاننگانے کہ وکیل سفائی بے گناہی نا شاہدی پیش کننگ کتو، و پراسکیوشن نا کنڈآن رشوت نا شاہدی تا ورندی ءِ ہم تننگ کتو۔ بانی چیئرمین پی ٹی آئی عدالت اٹی پبی شاہدی پیش کننگ اٹ بے سہب مس۔ وزیرحوالکاری پارے کہ داکیس اٹی مذہب کارڈ ءِ کاریم اٹ اتنگا۔ داہراانصاف ءِ کہ برطانیہ نا نیشنل کرائم ایجنسی نا کنڈآن ضبط مروک زر وصول مس، نی ہراڑآن ضبط کریس ہمونا دُوٹی تسوس، و دانا عوض زمان پارک لاہور اٹی 25 کروڑ نا اُراس جوڑ کرے۔ ہیرانا پنچ پنچ قیراط نا چَلو ہلک،دوسد کنال ڈغار ہلک و اَرے و زائیفہ فراڈٹرسٹ جوڑ کریر، القادر ٹرسٹ ایدھی یا چھیپا سے نا اف ، نی اونا کانودی وڑاٹ ورندی ءِ ایت۔ نا رشوت، کرپشن و ڈاکہ پک مسنے، داپیسہ غاک پاکستان نا الس نا امانت ئسر، ہرافتے اسہ ہندن ءُ بندغ اسے نا دُوٹی تننگا ہراڑآن اوجرمانہ نا وڑاٹ ضبط کننگاسر۔ بنجائی وزیر حوالکاری پارے کہ اینو انصاف نا بول بالا مسنے، داپاکستان نا تاریخ نا بھاز بھلو فیصلہ اسے، داکیس اٹی اپیل نا حق دوئی ءِ ولے نم اپیل اٹی کارے تو دا پک کروئی مریک کہ این سی اے زر ءِ حکومت ءِ پاکستان ءِ انت اکن تس؟ داپک کروئی مریک کہ بند لفافہ ءِ کابینہ غا انت اکن دریر؟ دا پک کروئی مریک کہ نی فراڈ ٹرسٹ اس جوڑ کریس ، لاہور اٹی 25 کروڑ نا اُراجوڑ کتو ، پنچ قیراط نا چَلو خواتو، دوسد کنال ڈغار اسلام آباد اٹی التو۔ اوپارے کہ مذہبءِ تینا گندہ انگا ڈوہ و مون انگا کرتوت آتے ڈکھنگ کن کاریم اٹ اتپہ، دااوپن اینڈ شٹ کیس ئس، اونا کرپشن پک مسنے، داکیس اٹی کانودی لوازمات آتے پوو کننگا وسزا بنفنگا ہراکانود، میرٹ و شاہدی تا رداٹ ءِ۔ بانی چیئرمین پی ٹی آئی تینا بے گناہی ءِ پک کننگ اٹ بے سہب مس۔ اوکیس ءِ چٹفنگ نا کوشست کرے، التواء نا گواچی کرے، سیاسی بیانات تس۔ اوپارے کہ اینو مچ آملک انا پنی آ وکیل آک پاننگ ءُ کہ دا فیصلہ کانود نا رداٹ ءِ، آزاد مبصر، و جاچکار آک ہم اسہ ہی ہیت ءِ کننگ ءُ کہ 190 ملین پاؤنڈ نا دا کیس رشوت، میگا کرپشن و پاکستان نا تاریخ نا غٹ آن بھلا ڈاکہ ءِ۔ اسہ سوج اسے نا ورندی ٹی بنجائی وزیر حوالکاری پارے کہ شہزاد اکبر ایسٹ ریکوری یونٹ نا سروک ئس، دایونٹ نا دستاویز ات مون آ بسنوہراٹی 190 ملین پاؤنڈ ءِ آفیشل ریکارڈ اٹی ریکوری ظاہر کننگانے۔ ایسٹ ریکوری یونٹ وزیراعظم آفس اٹی کرپشن ءِ توننگ و کرپشن نا پیسہ غاتے ریکور کننگ کن جوڑ مسوسس، داسہ شہزاد اکبر نا دستاویز آتا رداٹ دازر ءِ بازیات کننگا ہرا سرکاری خزانہ ٹی بایدے جمع مروسر۔
