اسلام آباد۔ 16 جنوری (اے پی پی) بنجائی وزیر حوالکاری ، شینکاری، قومی میرات و دودوربیدہ عطاءا للہ تارڑ پارینے کہ دیامربھاشاڈیم دنیا نا بھلا ڈیم تیان مریک، دیامربھاشاڈیم جوڑ مننگ آن نوکاپ نا خطرہ غاتا کم مننگ اٹی کمک رسینگک، بانی چیئرمین پی ٹی آئی، اونا اُرائی و فرح گوگی 190 ملین پاؤنڈنا غبن کرینو، نیشنل کرائم ایجنسی حکومت پاکستان ءِ پاکستان نا الس نا پیسہ غاتے پدی تس۔ ہمووخت انا کابینہ بند لفافہ ٹی دازر انا منظوری ءِ تس، ہراڑآن پیسہ ہلنگا اودے پدی تننگا، 190 ملین پاؤنڈ کرپشن کیس اٹی اونا دوک مین ءُ۔ پنچ شنبے نادے آ قومی اسمبلی ٹی وقفہ سوج آتیٹی قومی اسمبلی نا باسک آغارفیع اللہ و محمد جاوید حنیف خان نا سوج آتا ورندی ٹی بنجائی وزیر حوالکاری عطاء اللہ تارڑ پارے کہ دیامربھاشاڈیم دنیا نا بھلا ڈیم تیان مریک، دیامربھاشاڈیم جوڑ مننگ آن نوکاپ نا خطرہ غاتا کم مننگ اٹ کمک رسینگک۔ 2010ء ٹی سندھ و سویلی پنجاب نا علاقہ غاتیٹی نوکاپ نا بھسکاری مس۔ اوپارے کہ دیامربھاشاڈیم اکن 2013ء ٹی ننا دور اٹی ڈغار دوئی کننگا۔ وزیر حوالکاری پارے کہ اولیکو ریسہ ٹی دیامربھاشا ڈیم اکن مئی 2024ء ٹی دریائے سندھ انا ڈائیورژن نا کاریم پورو مس، جون 2024ء ٹی داڑکن آخبتی برج جوڑ کننگا۔ اوپارے کہ نیلم جہلم نا پوروی آ کیہی سال لگا ہرانا سوب آن اونا خڑچ اٹی کیہی گنا ودکی مس، کوشست کننگک کہ دیامربھاشاڈیم انا وخت آ پوروی ءِ کننگے، انٹرنیشنل ٹیکنیکل کنسلٹنٹ نا خذمت ہم دوئی کننگانے۔ وزیر حوالکاری پارے کہ نیشنل کرائم ایجنسی حکومت پاکستان ءِ پاکستان نا الس نا پیسہ غاتے پدی تسوسس، ہمووخت انا کابینہ بند لفافہ ٹی منظوری کرے و ہراڑآن پیسہ ہلنگا ہموفتے پدی کننگا، 190 ملین پاؤنڈ کرپشن کیس اٹی اوفتادوک مین ہلوک ءُ، بانی چیئرمین پی ٹی آئی، اونا اُرائی و فرح گوگی 190 ملین پاؤنڈ نا غبن کرینو و تینا جیب آتے پُر کرینو۔ وزیر حوالکاری پارے کہ انت دا پیسہ غاک حکومت پاکستان آ بسر؟ اگہ بسر تو او پاکستان نا السءِ ملار؟ ورندی ارے اف، دازر ءِ اسہ پین جرمانہ سے نا عوض سپریم کورٹ اٹی جمع کرفنگا، 80 ارب روپئی نا میگا کرپشن بند لفافہ نا کمک اٹ کننگا، داپیسہ غاتے اوفک تینا جیب آتیٹی شاغار۔ محمد جاوید حنیف خان نا ضمنی سوج آ اوپارے کہ داوخت آپاکستان اٹ بجلی نا پیدوار سرپلس ءِ، وزارت توانائی دابارواٹی چندی پلو آتیا سجفنگ اٹی ءِ۔
