اسلام آباد۔ 16 جنوری (اے پی پی) وزیراعظم محمد شہباز شریف پارینے کہ زرگزران نا شونداری آئی ٹی نا شونداری تون گنڈوک ءِ ، حکومت نا زرکار دوست پالیسی تیٹی آئی ٹی برآمد آتیٹی پدریسہ ودکی مننگ ءِ ، ملک اٹی جہانی کمپنی تا زرکاری آن ورناتیکن ملازمت نا وارخواہیک ودرہ، جہانی کمپنی مینزس ایوی ایشن نا پاکستان اٹی بننگ آن ملک اٹی پوسکن آ ٹیکنالوجی ءِ مون آ دننگ ملک۔ وزیراعظم آفس نا میڈیا ونگ آن جاری بیان نا رداٹ اوداخیال آتا درشانی ءِ پنچ شنبےنادے آ جہانی شہرت یافتہ لاجسٹکس کمپنی مینزس ایوی ایشن نا چیف ایگزیکٹیو آفیسر فلپ جوئینگ نا کماشی ٹی 6 باسکی ڈل اتون گپ وتران کرسا کرے ہرا وزیراعظم تون داڑے اوڑدہی کریر۔ اوڑدہی ٹی بنجائی وزیر حوالکاری و شینکاری عطاء اللہ تارڑ وزیرمملکت آئی ٹی شزافاطمہ خواجہ ئسک ساڑی ئسر۔ وزیراعظم مینزس ایوی ایشن نا کنڈآن پاکستان اٹی آئی ٹی انفراسٹرکچر و آسراتی ڈیسک اس جوڑ کننگ نا ستاءِ کرے۔ وزیراعظم پارے کہ پاکستان اٹی مینزس ایوی ایشن کون آ جہانی شہرت یافتہ کمپنی نا سروس آتا بناء ننا سوگو زرگزران اٹی جہانی زرکاری آتیکن کاروبار نا لامحدود کچ مننگ نا سند ءِ۔ جہانی کمپنی مینزس ایوی ایشن نا پاکستان اٹی بننگ آن ملک اٹی پوسکن آ ٹیکنالوجی ءِ مون آ دننگ ملک۔ وزیراعظم پارے کہ دا ملکی زرگزران خاص وڑاٹ آئی ٹی بشخ اکن بھاز اہم ءُ مزل نا نشان اسے۔ ملکی زرگزران نا شونداری آئی ٹی بشخ انا شونداری تون گنڈوک ءِ۔ ساڑی آ زرکار دوست پالیسی تیٹی ملک انا آئی ٹی برآمد آتیٹی پدریسہ ودکی مننگ ءِ۔ پدریسہ ودوک آ آئی ٹی برآمد آک بھاز ستاکڑزرہ۔ وزیراعظم پارے کہ ساڑی آ زرگزرانی شونداری و مینزس ایوی ایشن نا پاکستان آ بننگ آن ایلو جہانی کمپنی تے ملک اٹی زرکاری کن راغب کننگ مریک۔ مثبت زرگزرانی ٹک آک ساڑی آ زرگزرانی پالیسی نا ملک اٹی کاروبارنا چاگڑد کن سازگار مننگ نا ڈیک ءِ۔ وزیراعظم پارے کہ ملک اٹی جہانی کمپنی تا زرکاری آن ورناتیکن ملازمت نا وارخواہیک ودرہ۔ حکومت زرگزرانی سوگوی آن پد ملکی شونداری کن پورو وڑاٹ متحرک ءِ ۔ وزیراعظم پاکستان اٹ مینزس ایوی ایشن نا اولیکو دفترنا جوڑ کننگ نا بناءِ کرسا تختی نا نقاب کشائی ءِ کرے۔
