اسلام آباد۔ 16 جنوری (اے پی پی) بنجائی وزیر حوالکاری و شینکاری، قومی میرات و دودوربیدہ عطاء اللہ تارڑ پارینے کہ ہراقومک تینا مستین آ گمر کپسہ او اسُل شون ہلنگ کپسہ، پاکستان و ترکیہ نا سنگتی نا بھلو تاریخ اسے، پاک ترکیہ فرینڈ شپ ریڈیو میوزیم نا جوڑ کننگ نا مسخت بروک آ چین تے پاکستان و ترکیہ نا تعلقداری تا اہمیت آن روشناس کرفنگ ءِ۔ پاکستانی ترکیہ ءِ تینا ارٹ میکو اُراتکرہ۔ بنجائی وزیر حوالکاری و شینکاری عطاء اللہ تارڑ پاک ترکیہ فرینڈ شپ ریڈیو میوزیم نا بنائی دود آن تران کرساپارے کہ اینو نن تاریخ ناہمو بشخ ءِ رکھ کرینن ہرا ننا درستی راستی جوڑ مس، پاکستان نا جوڑ مننگ آن ہلیس اینو اسکان ریڈیو پاکستان نا تاریخی پس منظر ءِ نن بروک آ وخت آتیکن رکھ کرینن۔ پاک ترکیہ فرینڈ شپ ریڈیو میوزیم نا جوڑ کننگ نا اہمیت ءِ تالان کرسا بنجائی وزیر حوالکاری پارے کہ پاکستان و ترکیہ نا سنگتی نا بھلو تاریخ اسے، پاکستان نا جوڑ مننگ آن مست ہم برصغیر نا مسلمانک ترکیہ نا مسلمان تا کمک ءِ کریر، ترکیہ و پاکستان نا است اسہ ایلو تون تفوک ءُ، پاکستانی ترکیہ ءِ تینا ارٹ میکو اُراتکرہ، ہڑتوم آ ملک آتا تعلقداری دہائی تیا تالان ءِ۔ اوپارے کہ ننا فرض ءِ کہ نن نسل درنسل دا مہرومریبت و ایلمی نا چرجوئی ءِ مون آ دین۔ ننے بروک آ چین تے پاکستان و ترکیہ نا تعلقداری آن معلومدار کننگ نا گرج ءِ۔ وزیر حوالکاری پاکستان و ترکیہ نا نیام اٹ کمکاری ءِ ایلو بشخ آتیٹی ہم ودفنگ نا گرج آ زور شاغسا پارینے کہ ترکش ءِ آپریشن کوآرڈینیشن ایجنسی (ٹیکا) داڑے تینا پروجیکٹ نا بناءِ کرے۔ اوپارے کہ پاک ترکیہ فرینڈ شپ ریڈیو میوزیم نا جوڑ کننگ نا مسخت بروک آ چین تے پاکستان وترکیہ نا تعلقداری نا اہمیت آن روشنا کرفنگ ءِ۔ بروک آ چینک خنر کہ ریڈیوپاکستان پاکستان نا جوڑ مننگ آن ہلیس اینو اسکان انت کڑد اداکرے۔ اوپارے کہ داسہ دور بدل مسنے، داوخت آ ٹیلی وژن ہم ہندا ئس، سوشل میڈیا، پوڈکاسٹ و وی لانگ ہم ہندا ئس، ہر گڑا ریڈیو نا کمک اٹ مسکہ۔ اوپارے کہ پاکستان نا پنی آ ادارہ غاتا گیشتری تینا کیریئر نا بناءِ ریڈیو پاکستان آن کریر و پیشن نا ملک ہنسا پاکستان نا عزت اٹی ودکی کریر ہرا فتیا ننے بھلو گمر اسے۔ اوپارے کہ السی آگاہی و معلومداری نا فراوانی نا بابت ریڈیو پاکستان نا اہم ءُ کڑد اس مسنے، ننا زرگزران نا شونداری ٹی آرٹس و کلچر نا اسہ کڑد اسے، زرگزران نا گچینی و اودے سوگو کننگ اٹی ہم ریڈیونا کڑد مسنے۔ وزیر حوالکاری پارے کہ پاکستانی قوم دنیاٹی غٹ آن زیات آسودہی سرجزآتیٹی بشخ ہلیک، کشمیر اٹی زمی جمب مس مچ آپاکستان آن مخلوق یکجا مرسا ہموڑے رسینگار، 2010ء نا نوکاپ اٹی مچ آ پاکستان آن مخلوق امدادی گڑاتے ہرفسا بسر، ہراتم آفت اس برے نن اسٹ مرینہ۔ وزیرحوالکاری پارے کہ مستین اٹی ہم ہراتم موڈآف کمیونیکیشن خاص الوکہ تو مخلوق نا ہراوڑاٹ کمک ءِکروئی ءِ، آفت زدہ علاقہ غا امر سرمروئی ءِ، داٹی ریڈیو نا اہم ءُ کڑد اس ئس۔ عطاء اللہ تارڑ پارے کہ اینو نن تینا مستین و تینا تاریخ ءِ رکھ کننگ و ریڈیو پاکستان نا کڑدءِ اڈتننگ اُن، ننے داہیت انا خوشی ءِ کہ ریڈیوپاکستان اٹی پوڈ کاسٹ بناکرے و داڑآن بھاز انگا مخلوق فائدہ ہرفنگ ءِ۔ بنجائی وزیر پارے کہ ریڈیو نا آرکائیوز ءِ رکھ کننگ، ریڈیوپاکستان نا شونداری نا بابت پین کاریم کننگ نا گرج ءِ۔ ہراوڑمستین اٹی مخلوق ریڈیو پاکستان ءِ خفتوریرہ ہندا وڑ اونا ڈیجیٹل پلیٹ فارم آتے ہم مخلوق سبسکرائب کیر، ریڈیو پاکستان نا فلاح و بہبود ننا ذمہ ءِ، غٹ آفیسر آک تینا ملازم آتیان ہم سلاہ ہلیر، ننے بروک آ بجٹ آن مست اودے گڈیکو دروشم اس ترسا حکومت آ دینہ کہ ریڈیو پاکستان ءِ ریوائیو کننگ کن داگڑاتا گرج ءِ۔ بنجائی وزیر پارے کہ پاکستان وترکیہ ءِ تینا ملک انا مخلوق نا شونہال آخبت کن اواری اٹ مون آ ہِننگ نا گرج ءِ و ننے مخلوق نا نیام اٹ مثبت رابطہ غاتے مون آ دروئی مریک۔
