اسلام آباد۔ 16 جنوری (اے پی پی) وزیراعظم محمد شہباز شریف غزہ ٹی جنگ بندی نا خیرمقدم ءِ کرسا پارینے کہ پاکستان اقوام متحدہ نا قرارداد آتا رداٹ فسلطین نا ویل انا اِراریاستی ایسری نا تینا موقف نا درشانی ءِ کیک، جنگ زدہ علاقہ غاتیٹی انسانی ہمدردی نا بنداو آ امداد نا فراوانی بھاز اہم ءِ، اومیت ءِ کہ جنگ بندی نا پورو شرف ءِ کننگک۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ او ومچ آ پاکستانی قوم فلسطین خاص کر غزہ ٹی جنگ بندی نا خیرمقدم ءِ کینہ۔ امن نا دوئی کننگ کن قطر، سعودی عرب، امریکہ ، مصر و ایلو سنگت ملک آتا سخت کوشست آتے است آن دننگ مفک۔ وزیراعظم پارے کہ امن و ایمنی کن غزہ و ایلو جنگ زدہ علاقہ غاتیٹی انسانی ہمدردی نا بنداو آ امداد نا فراوانی بھاز اہم ءِ، ننے اومیت ءِ کہ دا جنگ بندی نا پورو وڑاٹ شرف ءِ کننگک۔ پاکستانی الس فلسطینی ایلم و ایڑھ تتون سلوک ءُ و تدوک آ کیہی دہائی آن اسرائیلی جارحیت نا برخلاف جہد اٹی تینا جان و مال انا نذرانہ پیش کروک آتے خراج عقیدت پیش کیرہ۔ اوپارے کہ پاکستان اقوام متحدہ نا قرارداد آتا رداٹ فلسطین نا ویل انا اِراریاستی ایسری نا تینا موقف نا درشانی ءِ کیک۔ 1967 آن مست انا دنگ آ تالان القدس شریف دارالحکومت نا وڑاٹ آزاد فلسطین ہی داویل انا پائیدار ایسری ءِ۔
