اسلام آباد۔ 16 جنوری (اے پی پی) پاکستان غزہ ٹی جنگ بندی معاہدہ نا خیرمقدم ءِ کرسا اوڑآ دمدستی و پورو عملدرآمدی نا خواست کرینے۔ ترجمان دفترخارجہ نا کنڈآن پنچ شنبے نادے آ جاری بیان اٹی اومیت ظاہر کننگانے کہ دا جنگ بندی آخبتی جنگ بندی نا سوب جوڑمریک و انسانی امداد ءِ ودفنگ اٹ کمک رسینگک۔ بیان اٹی مستی پاننگانے کہ اسرائیلی کوزہ گیر فوج انا کنڈآن طاقت نا اندھادھند کاریم اٹ اتنگ آن بھاز جانی و ملکیت آتا نسخان مسنےو داڑآن لکھ آ بے گناہ فلسطینی شاری بے اُرا مسنو۔ ترجمان تینا بیان اٹی پارے کہ اسرائیل نا ودکی پسندانہ عزم مچ آ ڈیہہ ءِ نزور کرینے۔ بیان نا رداٹ پاکستان فلسطین نا ویل انا انصاف اٹ، جوان و پائیدار ایسری کن تینا مخ تفی نا درشانی ءِ کیک ہراٹی جون 1967 آن مست انا سیم تیا تالان اسہ وتواجہ فلسطینی ریاست اس جوڑ مرے، ہرانا دارالحکومت القدس الشریف مرے۔
