اسلام آباد۔ 16 جنوری (اے پی پی) وزیراعظم محمد شہباز شریف یوتھ پروگرام نا رداٹ وام انا زر ءِ 5 لکھ آن ودفسا 15 لکھ روپئی کننگ، چنکا و نیامی درجہ نا کاروبار ءِ تروک آ آسراتی تے جہانی خواست آتون ہم گرنچ کننگ کن شون ہلوک ملک آتا ماڈل آتا اطلاق ءِ پک کننگ نا پارت کرساپارینے کہ ایس ایم ایز زرگزران نا شونداری ٹی اہم اہمیت تخک، حکومت ورناتے کاروبار نا ترغیب تننگ کن آسراتی فراوان کیک۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی چنکا و نیامی درجہ نا کاروبار (ایس ایم ایز) نا بابت جاچ دیوان اڈہلک۔ وزیراعظم چنکا پیمانہ نا کاروبار کن وزیراعظم یوتھ پروگرام نا رداٹ وام تاز رءِ 5 لکھ آن ودفسا 15 لکھ کننگ، مچ آملک اٹی چنکا و نیامی درجہ نا کاروبار ءِ آسراتی تا فراوانی کن اوفتا سرجمی اٹ سروے ءِ زوت پورو کننگ و چنکا و نیامی درجہ نا کاروبار ءِ تروک آ آسراتی تے جہانی خواست آتون ہم گرنچ کننگ کن شون ہلوک ملک آتا ماڈل آتا اطلاق ءِ پک کننگ ناپارت کرے۔ اوچنکا کچ انا کاروبار اٹی زالبول آتیکن خصوصی پیکج اس ٹہیفسا زوت پیش کننگ نا ہم پارت کرے۔ وزیراعظم پارے کہ حکومت شاری تے کاروبار نا ترغیب تننگ کن چنکا و نیامی درجہ نا کاروبار ءِ آسراتی تننگ کن سنبرینگوک ءِ۔ مچ آ دنیاٹی ایس ایم ایز زرگزران نا شونداری ٹی اہم اہمیت تخک۔ ایس ایم ایز ءِ مون آدرسا ملکی برآمد آتیٹی ودکی حکومت نا اولیت ءِ۔ حکومت ورنا و زالبول انٹرپرینیورآتے داخہ در واکدار کننگ کن کوشست ءِ کہ او نئے بیرہ تینٹ رزگار کٹیا کیر بلکن روزگار نا پین وارخواہی ودی کیر۔ دیوان اٹی وزیراعظم نا خصوصی پارت آتے مون آ تخسا ایس ایم ایز نا شونداری و آسراتی کن حکومتی گام گیج آتیا پیش رفت آن معلومدار کننگا۔ دیوان ءِ پاننگاکہ وزیراعظم نا پارت آ عملدرآمد کرسا غٹ اسٹیک ہولڈر آتے پت اٹ ہلنگ آن پد ایس ایم ایز کن وام تا فارم ءِ پین آسان و سادہ کننگانے تانکہ زیات آن زیات ایس ایم ایز تینا کاروبار نا گچینی کن وام تا آسراتی آن فائدہ ہرفنگ کیر۔ دیوان ءِ پاننگاکہ ایس ایم ایز نا درجہ بندی دابابت کننگ انگ ءِ کہ غٹ چنکا و نیامی درجہ نا کاروبار حکومتی کمک و آسراتی آن زیات آن زیات فائدہ ہرفنگ کیر و اوفتے وخت آ و آسان شڑت آتیا وام تا فراوانی پک مرے۔ وزیراعظم نا پارت آ ایس ایم ایز اٹی بھاز چنکا درجہ و اُرائی زالبول آتا چنکا کاروبار نا آسراتی کن اسہ پوسکن ءُ کیٹیگری اس درستی راستی کرفنگک ہراٹی اوفتے وام انا دوئی کننگ اٹ آسانی آن ہلیس کاروبار نا گچینی کن حکومتی کمک دوئی کننگ اٹ آسانی مریک۔ دیوان ءِ ادارہ شماریات پاکستان نا کنڈآن مسہ بھلا شار تیٹی ایس ایم ایز نا ٹک آتیان معلومدار کننگا و پاننگاکہ بروک آ منہ تُو اٹی مچ آ ملک اٹی ساڑی ایس ایم ایز ءِ گچین آسراتی تا فراوانی نا ڈٹ بندی کن سروے کننگک۔ دیوان اٹی وزیراعظم نا پارت آ ایس ایم ایز ءِ کمکاری نا حکومتی لائحہ عمل نا ہدف و اوفتا پوروی نا مد آ جوان حوال ہم تننگا۔ دیوان ءِ پاننگاکہ سمیڈابرجاسال فروری اسکان ایس ایم ایز کن فنانشل لٹریسی و ہیلکاری پروگرام نا بناءِ کیک۔ داکان بیدس پوسکن آ ٹیکنالوجی آن درستی راستی کرفنگ کن پروگرام ءِ برجاسال انا نیام اسکان گڈیکو دروشم تننگک۔ دیوان ءِ ایس ایم ایز نا بابت ملکی برآمد آتیٹی ودکی کن جوان لائحہ عمل نا ہدف و اوفتا معینہ مد انا بابت ہم معلومدار کننگا۔ دیوان ءِ زالبول انٹرپرینیورآتا شونداری کن مرتب کروک آ پالیسی آ پیش رفت آن ہم معلومدار کننگا۔ دیوان اٹی بنجائی وزیررانا تنویر حسین، احد خان چیمہ، وزیر مملکت شزافاطمہ خواجہ، گورنر اسٹیٹ بینک جمیل احمد، ہر چار آ صوبائی چیف سیکرٹریک ، ایس ایم ایز بشخ انا نمائندہ غاک و تعلقدار بڑزکو کمامدارآک بشخ ہلکر۔
