اسلام آباد۔ 15 جنوری (اے پی پی) پاکستان بھارت نا وزیر دفاع و چیف آف آرمی اسٹاف نا بے بنداو دوبہ و دعویٰ تے سختی اٹ مسترد کرساپارینے کہ جموں وکشمیر جہانی وڑاٹ امنا مروک متنازعہ علاقہ اسے، ہرانا حتمی حیثیت نا تعین اقوام متحدہ نا سلامتی کونسل نا تعلقدار قرارداد و کشمیری الس نا است خواہی تا رداٹ کننگ ءِ۔ ترجمان دفترخارجہ نا کنڈآن چارشنبے نادے آ جاری بیان اٹی پاننگانے کہ دارداٹ بھارت تون آزاد جموں و کشمیر و گلگت بلتستان نا علاقہ غاتیا فرضی دعویٰ کننگ نا ہچ ءُکانودی یا اخلاقی بنداو اف۔ بیان نارداٹ بھارتی سرکڑدہ غاتا کنڈآن داوڑنا بیان بازی آن جہانی چکار انسانی حق انا سنگین خلاف ورزی و بھارت نا غیرکانودی کوزہ ٹی جموں وکشمیر اٹی برجا جابرانہ گام گیج آتیان اینک کننگ مفک۔ داگام گیج کشمیری الس نا اوفتا ناقابل تنسیخ حق خودارادیت نا روا و منصفانہ جہد ءِ توننگ نا کوشست اسے۔ ترجمان تینا بیان اٹی مستی پارے کہ پاکستان داہیت آ ہم زور شاغک کہ داوڑنا اشتعال انگیز بیان علاقائی امن و سوگوی کن نسخاندہ ءِ۔ بیان نا رداٹ ایلوفتا برخلاف بے بندا و دوبہ خلنگ نا جاگہ غا بھارت تینا جاچ ءِ ہلے و درملکی علاقہ غاتیٹی ٹارگٹڈ خون، تخریب کاری و ریاستی سرپرستی ٹی دہشت گردی نا ڈٹ بندی ٹی دستاویز آتیان ثابت شمولیت نا بایدے ازالہ ءِ کننگے۔
