اسلام آباد۔ 15 جنوری (اے پی پی) وزیراعظم محمد شہباز شریف الیکٹرک وہیکل آتا بابت پالیسی نا ستاءِ کرسا پارینے کہ الیکٹرک وہیکل آتیان چاگڑدی کچٹی نا مون ءِ توننگ و زرکاری ءِ ودفنگ اٹ کمک رسینگک۔ چارشنبے نادے آ ملک اٹی الیکٹرک وہیکل آتا مون آ دننگ آ حکومتی پالیسی نا بابت دیوان آن تران کرسا وزیراعظم پارے کہ دنیا چاگڑدی بدلی تا بابت فریشان ءِ، کاپ 29 اٹی ہم دابابت گپ وتران مس۔ پاکستان اٹی ہم داوڑنا بدلی المی و فائدہ ئی ءِ، ہرافتیان چاگڑدی کچٹی کم مرے۔ وزیراعظم الیکٹرک وہیکل آتا بابت وزارت بجلی نا پالیسی تا ستاءِ کرساپارے کہ الیکٹرک وہیکل آتا صنعت کن بجلی نا قیمت 70 روپئی آن کم مرسا 40 روپئی کننگ ستاکڑزک۔ داڑآن زرکاری نا است بڈی مریک۔ اوپارے کہ بجلی نا نہاد جوان مریک تو الیکٹرک وہیکل آتا صنعت ءِ مون آ دننگ ملک۔ اوپارے کہ دنیاٹی موسمیاتی بدلی نا بابت بھاز کاریم کننگ انگ ءِ و ہندنءُ گام گیج کننگ انگ ءِ ہرافتیان چاگڑدی کچٹی نا مون ءِ توننگ مرے۔ وزیراعظم پارت کرے کہ الیکٹرک وہیکل آتا صنعت کن بجلی نا نہاد اٹی 30 درسد کمتی نا بابت آگاہی فراوان کننگے۔ الیکٹرک وہیکل آتا چاگڑد آ مثبت اثرآتیان بیدس ایندھن نا بچت آن ہم زرگزران ءِ فائدہ مریک۔
