اسلام آباد۔15 جنوری (اے پی پی) وزیراعظم محمد شہباز شریف ایف آئی اے ءِ پیشن نا ملک انسانی اسمگلنگ نا مکروہ دھندہ ءِ چلیفوک آ بے کچ درکار اسمگلر آتا حوالگی کن انٹرپول آن کمک دوئی کننگ نا پارت کرسا پارینے کہ انسانی اسمگلنگ نا کمک اٹ ملکی ساکھ ءِ نسخان تروک آتا برخلاف بے کچ سخت کانودی کارروائی کننگک۔ چارشنبے نادے آ وزیراعظم آفس نا میڈیا ونگ آن جاری بیان نارداٹ وزیراعظم نا کماشی ٹی ملک اٹی انسانی اسمگلنگ نا چٹفنگ کن کروک آ گام گیج آتا بابت جاچ دیوان اس اڈ ہلک۔ وزیراعظم پرمان کرے کہ انسانی اسمگلنگ نا چٹفنگ کن غٹ ادارہ غاک فعال کڑد ادا کیر۔ اوپارے کہ انسانی اسمگلنگ نا مکروہ دھندہ چلیفسا ملکی ساکھ ءِ نسخان تروک آتا برخلاف بے کچ سخت کانودی کارروائی کننگک۔ وزیراعظم ایف آئی اے ٹی افرادی قوت نا کمتی ءِ دمدستی وڑاٹ پورو کننگ و بالی پٹ آتیا پیشن نا ملک سفر کروک آتا سکریننگ نا آب اٹ نظام جوڑ کننگ نا پارت کرے۔ اووزارت حوالکاری و شینکاری ءِ غیرکانودی پیشن نا ملک سفر و انسانی اسمگلنگ نا بارواٹی گچین آگاہی مہم چلیفنگ نا ہم پارت کرے۔ وزیراعظم ایف آئی اے ءِ پیشن نا ملک انسانی اسمگلنگ نا مکراہ دھندہ ءِ چلیفوک آ بے کچ درکار اسمگلر آتا حوالگی کن انٹرپول آن دوئی کننگ نا ہم پرمان کرے۔ دیوان اٹی انسانی اسمگلر آتا برخلاف داتم اسکان کروک آ گام گیج آتیا حوال تننگا۔ دیوان اٹی پاننگاکہ جون 2023و دسمبر 2024نا انسانی اسمگلنگ نا واقعہ غاتیٹی چندی انسانی اسمگلر دزگیر مسنے، چندی کمکار سرکاری کارندہ برطرف مسنو و کیہی تادیبی کارروائی تون مون تننگ ءُ، انسانی اسمگلنگ اٹی اوار سرکاری کارندہ غاتا برخلاف تعزیری گام گیج کننگ انگ ءِ، انسانی اسمگلر آتا 500 ملین روپئی آن زیات نا میرات ضبط مسنے و پین ضبط کننگ نا عمل ترندی اٹ برجاءِ، انسانی اسمگلر آتا استغاثہ نا عمل کن خصوصی پراسیکیوٹر تعینات مسنے۔ دیوان اٹی بنجائی وزیر اقتصادی امور احمد خان چیمہ ، بنجائی وزیر حوالکاری و شینکاری عطاء اللہ تارڑ و تعلقدار ادارہ غاتا بڑزکو آفیسر آک بشخ ہلکر۔
