راولپنڈی۔ 15 جنوری (اے پی پی) پاک بحریہ نا جہاز پی این ایس یمامہ ترکیہ نا بندرگاہ گولچک و اکساز نا دورہ ءِ کرے۔ بندرگاہ غا سرمننگ آ پاکستانی سفارت خانہ و ترک بحریہ نا بڑزکو کمامدارآک جہاز ءِ بخیرکریر۔ ترکیہ ٹی اڈکننگ ناوخت آ ترکش نیوی فلیٹ نا ڈپٹی کمانڈر وائس ایڈمرل ابراہیم اوزدین کوثر پی این ایس یمامہ نا دورہ ءِ کرے۔ ترکش نیوی فلیٹ ناڈپٹی کمانڈر ءِ جہاز نا لائخی تا بارواٹی سرجمی اٹ حوال تننگا۔ آئی ایس پی آر نا رداٹ پی این ایس یمامہ و ترک بحریہ نا جہاز آتا نیام اٹ بحری مشق ماوی وطن اڈتننگانے۔ مشق انا مسخت ہڑتوم آ بحری فوج آتا نیام اٹ تین پہ تینی کمکاری و اسیجائی آپریشن تا لائخی تے ودفنگ ئس۔ پی این ایس یمامہ نا دورہ ہڑتوم آ ملک آتا نیام اٹ سفارتی و بحری تعلقداری تے پین مون آ دننگ و ساڑی برادرانہ تعلقداری تے پین سوگوی تننگ نا موقع اس فراوان کیک۔
