اسلام آباد۔ 14 جنوری (اے پی پی) وزیراعظم محمد شہباز شریف ورناتے پیشن نا ملک ملازمت فراوان کننگ کن سنگت ملک آتا مارکیٹ آتا خواست آتا رداٹ لائحہ عمل جوڑ کننگ و پیشن نا ملک ملازمت فراوان کروک آ جعلی و بیدس لیسن کاریم کروک آ کمپنی تا برخلاف گام گیج نا پارت کرساپارینے کہ اڑان پاکستان ڈٹ آن مچ آملک اٹی روزگار نا پوسکن ءُ وارخواہی ودی مریک، روزگار نا وارخواہی تے ودفنگ کن ورناتے کسبی لائخی تیان شپ کننگ المی ءِ۔ داخیال آتا درشانی ءِ او سے شنبے نادے آ تینا کماشی ٹی پرائم منسٹر یوتھ پروگرام نا بابت اڈ ہلوک دیوان آن تران کرسا کرے۔ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ روزگار نا وارخواہی تے ودفنگ کن ورناتے کسبی لائخی تیان شُپ کننگ المی ءِ، تکنیکی و کسبی لائخی تا مون آ دننگ کن نیوٹیک و پرائم منسٹر یوتھ سکل ڈویلپمنٹ پروگرام تینا کڑد ءِ اداکیر۔ اوپارے کہ حکومت نجی بشخ ءِ مون آ درسا ملک اٹی بے روزگاری نا سدباب ءِ کننگ کن پالیسی آ عمل کننگ ءِ، پاکستان نا آخبتی آئی ٹی نا بشخ انا شونداری تون گنڈوک ءِ۔ وزیراعظم ورناتے پیشن نا ملک ملازمت فراوان کننگ کن سنگت ملک آتا مارکیٹ آتا خواست آتا رداٹ لائحہ عمل جوڑ کننگ و پیشن نا ملک ملازمت فراوان کروک آ جعلی و لیسن آن بیدس کمپنی تا برخلاف گام گیج کننگ نا پارت کرے۔ وزیراعظم ءِ پاننگاکہ زوت آتے اٹ ورناتیکن وزیراعظم ڈیجیٹل یوتھ ہب نا پن اٹ اسہ پلیٹ فارم اس جوڑ کننگ انگ ءِ ہراڑآن ورناتے ملازمت و ایلو خذمت آتا بابت معلومداری فراوان کننگک۔ وزیراعظم ڈیجیٹل یوتھ حب ءِ الس کن آسان کننگ کن انگریزی تون اوار اوار غٹ ہندی بولی تیٹی ہم درستی راستی کرفنگ نا ہم پارت کرے۔ دیوان اٹی وزیراعظم ءِ پرائم منسٹر یوتھ ایمپلائمنٹ پلان، افرادی قوت ءِ جہانی مارکیٹ اٹی درکار لائخی تیان شُپ کننگ کن گام گیج و ایلو ڈٹ آتا پیش رفت نا بابت معلومدار کننگا۔ دیوان اٹی بنجائی وزیر اقتصادی امور احد خان چیمہ ، چیئرمین پرائم منسٹر یوتھ پروگرام رانا مشہود احمد خان، وزیر مملکت آئی ٹی شزہ فاطمہ خواجہ و تعلقدار ادارہ غاتا بڑزکو آفیسر آک ساڑی ئسر۔
