اسلام آباد۔ 14 جنوری (اے پی پی) وزیراعظم محمد شہباز شریف پارینے کہ دہشت گردی نا چٹفنگ کن بے پناہ قربانی تا سوب آن فتنۃ الخوارج آک مدامی کن چُٹرہ، پاکستان دُوارہ امن نا وت جوڑ مریک، پی آئی اے نا بابت بندش آک چُٹنگ اٹی ءُ، لندن نا جہاز آک ہم زوت بحال مریرہ، بنجاصوبہ غاتون اواری اٹ تعلیمی پڑاٹی مون تروک چیلنج آتے ایسر کننگ کن متحرک کڑد ادا کیک۔ داخیال آتادرشانی ءِ او سے شنبے نادے آ بنجائی کابینہ نا دیوان اٹی گپ وتران کرساکرے۔ وزیراعظم پارے کہ پاکستان نا فوج آرمی چیف نا کماشی ٹی فتنۃ الخوارج آتا برخلاف آپریشن نا بناءِ کرینے۔ دے و نن کارروائی مننگ ءِ۔ بلوچستان اٹی انٹیلی جنس بیسڈ آپریشن اٹی 27 دہشت گرد آتے جہنمی کننگانے۔ ایلو جاگہ غاتیا ہم آپریشن برجاءِ۔ بے پناہ قربانی تننگ انگ ءِ ہرانا ننے غٹ ءِ درک و احساس بایدے مرے۔ داقربانی تا سوب آن فتنۃ الخوارج آک مدامی کن چٹرہ و پاکستان انشاء اللہ دُوارہ امن نا وت اس جوڑ مریک دُن کہ 2018ٹی نواز شریف نا کماشی ٹی پاکستان اٹی امن مسوسس ہمووڑہی دُوارہ امن مریک۔ وزیراعظم پارے کہ تاریخ داقربانی تے مدام یات تخک۔ وزیراعظم منہ دے مست اسلام آباد اٹی اسلامی دنیا و راج آتیٹی زالبول آتا تعلیم نا بابت شاندار کانفرنس نا اڈتننگ آ وزارت تعلیم و وزارت حوالکاری تون اوار تعلقدار کمامدارآتے شاباشی تس۔ اوپارے کہ کانفرنس اٹی زالبول و مسن تا تعلیم نا بابت مقالہ خواننگا۔ پاکستان اٹ زالبول آتا تعلیم نا بابت بھلو چیلنج مون تروک ءِ۔ 22.8 ملین چنااسکول آتیان پیشن ءُ ہرافتے ٹی گیشتری مسن تا ءِ، دا بھاز بھلو چیلنج اسے۔ وزیراعظم پارے کہ اوآئی سی نا سیکرٹری جنرل و مسلم ملک آتا وزراء تعلیم و ملالہ یوسفزئی نا کانفرنس اٹی ساڑی گری ستاکڑزوک ئس۔ تعلیم نا بشخ صوبہ غاتیا منتقل مسنے ولے بنجانا ہم بھاز بھلو کڑد اسے۔ بنجاءِ صوبہ غاتون اواری اٹ تعلیم نا پڑاٹ ہرا مشکل و چیلنج آک ءُ اوفتے ایسر کننگ کن متحرک کڑد ادا کننگے۔ نن تعلیمی ایمرجنسی ڈکلیئرکریسن۔ وزیراعظم وزیر تعلیم ءِ پارت کرے کہ او صوبہ غاتون خڑکی رابطہ ءِ استوار کرسا تعلیم نا پڑاٹ ساڑی مشکل و چیلنج آتون مون ایتر، دا قومی خذمت اس مریک۔ وزیراعظم پی آئی اے نا یورپ کن جہاز آتابحالی ءِ بھلو سرسہبی اس گوندا و پارے کہ بدبختی اٹ تدوک آ حکومت نا وزیر ہوابازی پارلیمان اٹ سلسا پاکستانی زرگزران ءِ بھس کننگ کن ہرا تقریر ءِ کرے، اونا بھسکار نتیجہ دوئی مس و پاکستان نا الس و زرگزران اوفتا بھرم ءِ کُننگ ءِ۔ کیہی سال انا زرگزرانی بھسکاری آن پد پی آئی اے ہرابندش آک خلنگاسر اوفک داسہ چُٹنگ ءُ۔ دااسہ بھاز بھلو سیٹ بیک اس ئس۔ وزیراعظم وزیر دفاع و تعلقدار کمامدار آتے دا سرسہبی آ مبارکبادی ترسا پارے کہ اوفتا کوشست آک رنگ ایسنو و اومیت ءِ کہ لندن کن پی آئی اے نا جہاز آک زوت بحال مریرہ و پاکستانی مسافر آتا مشکل آک کم مریرہ۔ وزیراعظم کابینہ ءِ پنجگور اٹی پوسکن آ پاک ایران سیمی کراسنگ نا بنانا بارواٹی معلومدار کرے و پارے کہ داڑآن کانودی واپار ءِ مون آ دننگک و سمگلنگ توننگک۔ وزیراعظم دا چرجوئی ٹی ایران نا کمکاری نا ستاءِ کرے۔ اوکابینہ ءِ پارے کہ کرم اٹی حالیت آک داسہ مست آنبار مننگ ءُ۔ امن معاہدہ ءِ بھلو دھچکہ اس لگاسس ولے داسہ حالیت آک گچین مننگ اٹی ءُ۔ مورچہ غاتے بِٹنگ انگ ءِ۔ خور و دوائی تا سپلائی بحال مسنے۔ وزیراعظم پارے کہ غٹ اسٹیک ہولڈر امن و متحارب گروپ آتیٹی بے چیٹی نا چٹفنگ کن اوار تولر تانکہ پین وخت اس دُن ءُ واقعہ مف۔ وزیراعظم پارے کہ وزارت بجلی نا ٹاسک فورس ترندی اٹ کاریم کننگ ءِ۔ جنکوز نا انت کاریم اسے کہ او پیمنٹس ہلے، دا سرکار نا کاریم ءِ کہ او پیمنٹس ہلے، ڈالر اٹی اوفتے ادائیگی مننگ ہم اسہ بھاز بھلو چیلنج اسے۔ کابینہ دا بابت گام گیج آتا جاچ ءِ ہلیک۔
